އާންމު ހާލަތަށް ގެނެއިތާ ދުވަސްކޮޅެއް ފަހުން އަނެއްކާވެސް ހެލްތް ޕްރޮޓެކްޝަން އޭޖެންސީ (އެޗްޕީއޭ)އިން ފުވައްމުލައް ސިޓީ މޮނީޓަރިންގެ ހާލަތަށް ލައިފިއެވެ.
މިދިޔަ މެއި މަހުގެ 5 ވަނަ ދުވަހުން ފެށިގެން މޮނީޓަރިންގެ ހާލަތުގައި ފުވައްމުލައް ސިޓީ އޮތުމަށްފަހު އާންމު ހާލަތަށް ގެނައި މި މަހުގެ 5 ވަނަ ދުވަހުއެވެ. ނަމަވެސް އަނެއްކާވެސް ޕޮޒިޓިވް ކޭސް ފެނި އެ ރަށް މޮނީޓަރިން އަށް ލައިފައި ވާކަން އެޗްޕީއޭ އިން އިއުލާންކުރީ މިއަދުއެވެ.
އެއާއެކު އެޗްޕީއޭ އިން މިވަގުތު މޮނީޓަރިންއަށް ލައިފައި އޮތް ރަށްތަކުގެ އަދަދަކީ 19 އެވެ.
ފުވައްމުލަކު ސިޓީގެ އިތުރުން، މި މަސްތެރޭގައި އެޗްޕީއޭ އިން ބަންދުކުރި ރަށްތަކުގެ ތެރެއިން މިވަގުތު މޮނީޓަރިންގައި އޮތީ 13 ރަށެކެވެ. އެއީ، އއ. ހިމަންދޫ ހދ. މަކުނުދޫ، ބ. އޭދަފުށި، ބ. ކަމަދޫ، އދ. ހަންޏާމީދު، ހދ. ނެއްލައިދޫ، ހއ. އިހަވަންދޫ، ގދ. ތިނަދޫ، އދ. ދަނގެތި، ގއ. މާމެންދޫ، ގއ. ކަނޑުހުޅުދޫ، މ. މަޑުއްވަރީ، އަދި ކ. ގާފަރެއެވެ.
އޭގެއިތުރުން، މިދިޔަ ޖުލައި މަހު އެޗްޕީއޭއިން މޮނީޓަރިންގެ ހާލަތަށް ގެނައި ރަށްތަކުގެ ތެރެއިން މިވަގުތު ބަންދުގައި އޮތް ހަތަރު ރަށަކީ، ކ. ކާށިދޫ، ށ.ފީވަށް، ހއ. ތަކަންދޫ، އަދި ދ ކުޑަހުވަދޫއެވެ. މީގެ އިތުރުން، މިދިޔަ މެއި މަހުގެ 25 ގައި މޮނީޓަރިންއަށް ލީ ރ. ދުވާފަރު އަދިވެސް އޮތީ ބަންދުގައެވެ.
މިވަގުތު ރާއްޖޭގެ ކޮވިޑް-19 ގެ ހާލަތު ރަނގަޅު ނަމަވެސް، އަތޮޅުތެރެއިން ބަލި ފެންނަލެއް އިތުރުވާކަން ފާހަގަކޮށްލެވެއެވެ. ނަމަވެސް މިހާރު މުޅި ރާއްޖެއިން 24 ގަޑިއިރު ތެރޭގައި ޕޮޒިޓިވަނީ 100 އެއް ހާ ކޭހެވެ.
