ކޮވިޑް-19 ގެ ކޭސްތައް ރަށުތެރެއިން ފެނި، ހެލްތް ޕްރޮޓެކްޝަން އޭޖެންސީ(އެޗްޕީއޭ) އިން އިތުރު ރަށެއް މޮނީޓަރިންއަށް ލައިފިއެވެ.
އެޗްޕީއޭއިން މިއަދު މޮނިޓަރިންގެ ހާލަތަށް ގެނެސްފައިވަނީ ގދ. ގައްދޫއެެވެ. މި ރަށް މޮނީޓަރިންގެ ހާލަތަށް ލީއިރު، އެޗްޕީއޭ އިން ވަނީ މި މަހުގެ 16 ވަނަ ދުވަހު މޮނީޓަރިންގެ ހާލަތަށް ލީ ބ. ކަމަދޫ ޢާއްމު ހާލަތަށް ގެނެސްފައެވެ.
މިއާއެކު މިވަގުތު މޮނިޓަރިންގެ ހާލަތުގައި އޮތް ރަށްތަކުގެ އަދަދު ވަނީ 18 އަށް އަރައިފައެވެ. އަދި މި މަސްތެރޭ ގައި ދިހައަކަށް ވުރެ ގިނަ ރަށެއް ވަނީ އެޗްޕީއޭއިން މޮނީޓަރިން އަށް ލައިފައެވެ.
މި މަހު މޮނީޓަރިން އަށް ލައިފައިވާ ރަށްތަކުގެ ތެރެއިން މިވަގުތު މޮނިޓަރިންގައި އޮތް ރަށްތަކަކީ، އއ. ހިމަންދޫ، ހދ. މަކުނުދޫ، އަދ. ހަންޏާމީދޫ، ހދ. ނެއްލައިދޫ، ހއ. އިހަވަންދޫ، ގދ. ތިނަދޫ، އަދ. ދަނގެތި، ގއ. މާމެންދޫ، ގއ. ކަނޑުހުޅުދޫ،، މ. މަޑުއްވަރީ، ކ. ގާދަރު، އަދި ޏ. ފުވައްމުލަކެވެ.
އޭގެ އިތުރުން މިދިޔަ ޖުލައި މަހު މޮނީޓަރިންއަށް ލީ ރަށްތަކުގެ ތެރެއިން، ކ. ކާށިދޫ، ށ. ފީވަށް، ހއ. ތަކަންދޫ، އަދި ދ. ކުޑަހުވަދޫ އަދިވެސް އޮތީ މޮނީޓަރިންގެ ހާލަތުގައެވެ. އަދި މިދިޔަ މެއި މަހު ގެ 25 ގައި އެޗްޕީއޭ އިން ބަންދުކުރި ރ. ދުވާފަރުވެސް އޮތީ މޮނީޓަރިން ގައެވެ.
ކޮވިޑް-19 ގެ ހާލަތު މިވަގުތު ކޮންޓްރޯލް ކުރެވިފައި އޮތްނަމަވެސް، އަތޮޅު ތެރޭގެ ރަށްތަކުން ޕޮޒިޓިވް ކޭސްތައް ފެންނަމުންދާލެއް އަންނަނީ އިތުރުވަމުންނެވެ. އަދި ގިނަ ދުވަސްތަކަކަށްފަހު ޖެހިޖެހިގެން ދެ ދުވަހު ތިން މީހަކު ވަނީ މި ބަލީގައި ރާއްޖެއިން ނިޔާވެފައެވެ. އެއާއެކު ރާއްޖެއިން މިހާތަނަށް ނިޔާވި މީހުންގެ އަދަދަކީ 225 އެވެ.
