ހެލްތް ޕްރޮޓެކްޝަން އޭޖެންސީ(އެޗްޕީއޭ) އިން މި މަހުގެ 18 ވަނަ ދުވަހު މޮނީޓަރިންގެ ހާލަތަށް ލައިފައިވާ އދ. ދަނގެތި ޢާއްމު ހާލަތަށް ގެނެސްފައެވެ.
މި މަހުގެ 16 ވަނަ ދުވަހު މޮނިޓަރިންއަށް ލީ ބ. ކަމަދޫވެސް މިއަދު ވަނީ މޮނިޓަރިންގެ ހާލަތުން ނަގައިފައެވެ. އެއާއެކު މިވަގުތު މޮނިޓަރިންގެ ހާލަތުގައި އޮތީ 17 ރަށެކެވެ.
މި މަހު މޮނީޓަރިން އަށް ލައިފައިވާ ރަށްތަކުގެ ތެރެއިން މިވަގުތު މޮނިޓަރިންގައި އޮތް ރަށްތަކަކީ، އއ. ހިމަންދޫ، ހދ. މަކުނުދޫ، އަދ. ހަންޏާމީދޫ، ހދ. ނެއްލައިދޫ، ހއ. އިހަވަންދޫ، ގދ. ތިނަދޫ، ގއ. މާމެންދޫ، ގއ. ކަނޑުހުޅުދޫ،، މ. މަޑުއްވަރީ، ކ. ގާދަރު، އަދި ޏ. ފުވައްމުލަކެވެ.
އޭގެ އިތުރުން މިދިޔަ ޖުލައި މަހު މޮނީޓަރިންއަށް ލީ ރަށްތަކުގެ ތެރެއިން، ކ. ކާށިދޫ، ށ. ފީވަށް، ހއ. ތަކަންދޫ، އަދި ދ. ކުޑަހުވަދޫ އަދިވެސް އޮތީ މޮނީޓަރިންގެ ހާލަތުގައެވެ. އަދި މިދިޔަ މެއި މަހު ގެ 25 ގައި އެޗްޕީއޭ އިން ބަންދުކުރި ރ. ދުވާފަރުވެސް އޮތީ މޮނީޓަރިން ގައެވެ.
ކޮވިޑް-19 ގެ ހާލަތު މިވަގުތު ކޮންޓްރޯލް ކުރެވިފައި އޮތްނަމަވެސް، އަތޮޅު ތެރޭގެ ރަށްތަކުން ޕޮޒިޓިވް ކޭސްތައް ފެންނަމުންދާލެއް އަންނަނީ އިތުރުވަމުންނެވެ. އަދި ގިނަ ދުވަސްތަކަކަށްފަހު ޖެހިޖެހިގެން ދެ ދުވަހު ތިން މީހަކު ވަނީ މި ބަލީގައި ރާއްޖެއިން ނިޔާވެފައެވެ. އެއާއެކު ރާއްޖެއިން މިހާތަނަށް ނިޔާވި މީހުންގެ އަދަދަކީ 225 އެވެ.
