ކޮވިޑް-19 ގެ ކޭސްތައް ރަށުތެރެއިން ފެނި، ހެލްތް ޕްރޮޓެކްޝަން އޭޖެންސީ(އެޗްޕީއޭ) އިން އިތުރު ރަށެއް މިއަދު މޮނިޓަރިން އަށް ލައިފިއެވެ.
އެޗްޕީއޭއިން މިއަދު މޮނިޓަރިންގެ ހާލަތަށް ގެނައި ދެވަނަ ރަށަކީ ވ. ތިނަދޫ އެވެ. މި ރަށް މީގެ ކުރިންވެސް ވަނީ މޮނިޓަރިންއަށް ލައިފައެވެ. އެރަށް މޮނީޓަރިންއަށް ލައިފައިވަނީ ވަކި ތަރުތީބެއް ނެތި ސާމްޕަލްތަކުން 10 ސާމްޕަލްއެއް ޕޮޒިޓިވްވުމާއި ގުޅިގެންނެވެ.
ތިނަދޫން ފުރަތަމަ ޕޮޒިޓިވްވީ އެ ރަށުގައި ޗުއްޓީ ހޭދަކުރި ފަތުރުވެރިން ތަކެކެވެ. އެގޮތުން ކޮވިޑަށް ޕޮޒިޓިވްކަން އެނގުނީ ޗުއްޓީ ނިއްމާލުމަށްފަހު ނެގި ސާމްޕަލް ތަކެއް ޕޮޒިޓިވްވުމުންނެވެ.
މި ރަށުގެ އިތުރުން އދ. މަހިބަދޫވެސް އެޗްޕީއޭ އިން ވަނީ މިއަދު މޮނިޓަރިންއަށް ލައިފައެވެ. އެއާއެކު މިހާރު ރާއްޖެެއިން މޮނިޓަރިންގައި އޮތީ 18 ރަށެކެވެ.
މި ދެ ރަށުގެ އިތުރުން މި މަހު މޮނީޓަރިން އަށް ލައިފައިވާ ރަށްތަކުގެ ތެރެއިން މިވަގުތު މޮނިޓަރިންގައި އޮތް ރަށްތަކަކީ، އއ. ހިމަންދޫ، އދ. ހަންޏާމީދޫ، ހއ. އިހަވަންދޫ، ގއ. ކަނޑުހުޅުދޫ، މ. މަޑުއްވަރީ، ކ. ގާފަރު، އަދި ޏ. ފުވައްމުލައް، ގދ. ގައްދޫ، ގދ. މަޑަވެލި، ތ.ވޭމަންޑޫ، ލ. މުންޑޫ، އަދި ށ. މިލަންދޫއެވެ.
އޭގެ އިތުރުން މިދިޔަ ޖުލައި މަހު މޮނީޓަރިންއަށް ލީ ރަށްތަކުގެ ތެރެއިން، ކ. ކާށިދޫ، ށ. ފީވަށް، އަދި ދ. ކުޑަހުވަދޫ އަދިވެސް އޮތީ މޮނީޓަރިންގެ ހާލަތުގައެވެ. އަދި މިދިޔަ މެއި މަހު ގެ 25 ގައި އެޗްޕީއޭ އިން ބަންދުކުރި ރ. ދުވާފަރުވެސް އޮތީ މޮނީޓަރިން ގައެވެ.
ކޮވިޑް-19 ގެ ހާލަތު މިވަގުތު ކޮންޓްރޯލް ކުރެވިފައި އޮތްނަމަވެސް، އަތޮޅު ތެރޭގެ ރަށްތަކުން ޕޮޒިޓިވް ކޭސްތައް ފެންނަމުންދާލެއް އަންނަނީ އިތުރުވަމުންނެވެ.
