ރާއްޖެއިން ކޮވިޑް-19 އަށް ޕޮޒިޓިވްވާ މީހުންގެ އަދަދު އެހެން ދުވަސްތަކާއި ހިލާފަށް އަނެއްކާވެސް މައްޗަށް ޖެހިލައިފިއެވެ.
ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ނެރުނު ތަފާސް ހިސާބުތަކަށް ބަލާއިރު އިއްޔެ ހަވީރު 18:00 އިން ފެށިގެން މިއަދުގެ އިރުއޮށްސުމާއި ހަމައަށް ޖުމްލަ 189 މީހުން ވަނީ ބައްޔަށް ޕޮޒިޓިވްވެފައެވެ.
އިތުރު 189 މީހުން ކޮވިޑަށް ޕޮޒިޓިވްވެފައިވާއިރު، ބަލި ޖެހިފައިވާ އެކްޓިވް ކޭސްތަކުގެ އަދަދު އުޅެނީ 1،794 ގައެވެ.
މިއަދު ޕޮޒިޓިވްވި މީހުންގެ ތެރެއިން އެންމެ ގިނަ ބަޔަކު ޕޮޒިޓިވްވެފައިވަނީ އަތޮޅުތެރެއިންނެވެ. އެގޮތުން 119 މީހުން ޕޮޒިޓިވްވީ އަތޮޅުތަކުގެ ތެރެއިންނެވެ. އަދި 35 މީހުންނަކީ މާލޭ ސަރަހައްދުން ބަލި ޖެހުނު މީހުނެވެ. އަދި ރިސޯޓަކުންވެސް 35 މީހަކު ޕޮޒިޓިވްވެފައި ވެއެެވެ. މިއީ ޓެސްޓްކޮށްފައިވަނީ އިތުރު 5،768 ސާމްޕަލްގެ ނަތީޖާއެވެ.
ރާއްޖޭގެ ކޮވިޑްގެ ހާލަތު އެހެން މަސްތަކާއި އަޅާބަލާއިރު، އެތައް ގުނައަކަށް ރަނގަޅުވަމުން އައިނަމަވެސް ކޮވިޑަށް ޕޮޒިޓިވްވާ މީހުންގެ އަދަދު އަތޮޅުތެރޭގައި އަންނަނީ ގިނަ ވަމުންނެވެ. އެގޮތުން މިހާރުވެސް ރަށުތެރެއިން ބަލި ފެނިގެން ވިއްސަށްވުރެ ގިނަ ރަށް މޮނިޓަރިންއަށް ވަނީ ލައިފައެވެ.
މިއަހަރުގެ އޯގަސްޓް މަސް ނިމުނުއިރު، ރާއްޖޭގެ ވެކްސިން ޖެހޭ އާބާދީގެ 85 އިންސައްތަ ވެކްސިންގެ ފުރަތަމަ ޑޯޒު ފުރިހަމަކޮށްފައިވާ ކަމަށް ސަރުކާރުން ވަނީ ހާމަކޮށްފައެވެ.
