ރާއްޖެއިން ކޮވިޑް-19 އިން ދިފާއުވުމަށް ޖަހާ ކޮވިޑް ވެކްސިންގެ އެއްވެސް ޑޯޒެއް ނުޖަހާ 30000 މީހުން އެބަތިބިކަމަށް ސަރުކާރުން ހާމަކޮށްފިއެވެ.
ރައީސް އޮފީހުގައި އިއްޔެ ބޭއްވި ނޫސްވެރިންގެ ބައްދަލުވުމުގައި ރައީސް އޮފީހުގެ ތަރުޖަމާނު މަބްރޫކް އަޒީޒް ވިދާޅުވީ، ރާއްޖެއިން 18 އަހަރުން މަތީގެ މީހުންގެ ތެރެއިން 85 އިންސައްތަ ވެކްސިންގެ ފުރަތަމަ ޑޯޒު ޖަހައިފައިވާ ކަމަށެވެ. އަދި 12 އަހަރާއި 17 އަހަރާއި ދެމެދުގެ 84 ޕަސެންޓް ކުދިން ވެކްސިންގެ ފުރަތަމަ ޑޯޒް ފުރިހަމަ ކޮށްފައިވާކަމަށެވެ.
މަބްރޫކް ވިދާޅުވީ، 18 އަހަރުން މަތީގެ އާބާދީއަށް ބަލާއިރު ތިރީހަކަށް ހާސް މީހުން ތިބީ ވެކްސިންގެ އެއްވެސް ޑޯޒެއް ނުޖަހާކަމަށެވެ. އަދި އޭގެ ތެރެއިން ގިނަ މީހުންނަކީ ރާއްޖެއިން ބޭރުގައި ދިރިއުޅޭ މީހުން ކަމަށެވެ.
މަބްރޫކް ވިދާޅުވީ، ވެކްސިން ނުޖެހި ތިބި މީހުންގެ ތެރޭގައި އުނދަގުލުން ރީޗް ވާން ޖެހޭ މީހުން ވަރަށް ގިނަ ކަމަށެވެ. އެހެންކަމުން މިވަގުތު ކުރެވެމުންދާ މަސައްކަތަކީ އެފަދަ ބޭފުޅުން ހޯދާ އެބޭފުޅުންގެ ކައިރިއަށް ގޮސް ވެކްސިން ދިނުމުގެ މަސައްކަތް ކަމަށް މަބްރޫކް ވިދާޅުވިއެވެ.
"މިވަގުތު ކުރެވެމުންދާ މަސައްކަތަކީ ވެކްސިން ނުޖެހި ތިބި މީހުންގެ ތެރޭގައި އުނދަގުލުން ރީޗް ވާން ޖެހޭ މީހުން ވަރަށް ގިނަ. އެހެންވީމަ އެފަދަ ބޭފުޅުން ހޯދާ އެބޭފުޅުންގެ ކައިރިއަށް ދިއުމުގެ މަސައްކަތް. މިސާލަކަށް 18 އަހަރުން މަތީގެ އާބާދީއަށް ބަލާއިރު 30 ހަކަށް ހާސް މީހުންނަށް މިތިބީ ވެކްސިންގެ އެއްވެސް ޑޯޒެއް ނުޖެހި. އޭގެ ތެރެއިން ގިނަ މީހުންނަކީ ރާއްޖެއިން ބޭރުގައި ދިރިއުޅޭ މީހުން،" މަބްރޫކް ވިދާޅުވިއެވެ.
