ރަށުތެރެއިން ކޮވިޑް-19 ގެ ޕޮޒިޓިވް ކޭސްތައް ފެނި ސ. ހުޅުމީދޫ އާއި ރ. ރަސްމާދޫ މިއަދު މޮނިޓަރިންއަށް ލައިފިއެވެ.
މިއަދާ ހަމައަށް އައިއިރު މި މަސްތެރޭގައި 3 ރަށެއް މޮނިޓަރިން އަށް ލައިފައިވާއިރު، ޖުމްލަ ގޮތެއްގައި ކޮވިޑްގެ ހާލަތު ރާއްޖޭގައި ރަނގަޅުނަމަވެސް، އަތޮޅުތެރޭގެ ބައެއް ރަށްރަށުން ކޮވިޑްގެ ކޭސްތައް ފެންނަލެއް އަންނަނީ އިތުރުވަމުންނެވެ.
އެގޮތުން މިދިޔަ މަހަކީ ގިނަ ރަށްތަކެއް މޮނިޓަރިންއަށް ގެެނެސްފައިވާ މަހެކެވެ. އަދި އެއާއެކު މިވަގުތު މޮނިޓަރިންގައި އޮތީ ޖުމްލަ 23 ރަށެކެވެ.
މިދިޔަ މަހު އެޗްޕީއޭ އިން މޮނިޓަރިންއަށް ލައިފައި ރަށްތަކުގެ ތެރޭގައި މިވަގުތު މޮނިޓަރިން އޮތް ރަށްތަކަކީ އއ. ހިމަންދޫ، އދ. ހަންޏާމީދޫ، މ. މަޑުއްވަރީ، ކ. ގާފަރު، ޏ. ފުވައްމުލައް، ގދ. މަޑަވެލި، ތ. ވޭމަންޑޫ، ލ. މުންޑޫ، ށ. މިލަންދޫ، އދ. މަހިބަދޫ، ވ.ތިނަދޫ، ށ. ކަނޑިތީމު، ހދ. ނޮޅިވަރަމް، މ. ވޭވަށް، ސ. ހިތަދޫ، ސ. މަރަދޫ، ސ. މަރަދޫ-ފޭދޫ، ސ. ފޭދޫ އަދި ހދ. ނޮޅިވަރަންފަރެވެ.
މިއަދު މޮނިޓަރިންއަށް ލީ ހުޅުމީދޫ އާއި ރަސްމާދޫގެ އިތުރުން މި މަހުގެ އެއް ވަނަ ދުވަހު މޮނިޓަރިން އަށް ލައިފައިވާ ރ. މަޑުއްވަރީވެސް އޮތީ ބަންދުގައެވެ. އަދި އޭގެ އިތުރުން މިދިޔަ މެއި މަހުގެ 25 ވަނަ ދުވަހު މޮނިޓަރިން އަށް ލައިފައިވާ ރ. ދުވާފަރު އަދިވެސް އޮތީ މޮނިޓަރިންގައެވެ.
