ފާއިތުވި ދުވަސްތަކުގައި ރާއްޖެއިން ކޮވިޑް-19 އަށް ޕޮޒިޓިވްވާ މީހުންގެ އަދަދު 100 އިން މަތީގައި އުޅުމަށްފަހު، މިއަދު ޕޮޒިޓިވްވީ މީހުންގެ އަދަދު އެއަށްވުރެ ދަށްވެއްޖެއެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ)އިން އާންމު ކުރި ތަފާސް ހިސާބުގައިވާ ގޮތުން ފާއިތުވި 24 ގަޑިއިރު ތެރޭގައި ޓެސްޓް ކުރި ށް 5,526 ސާމްޕަލްގެ ތެރެއިން މުޅި ރާއްޖެއިން ޕޮޒިޓިވްވެފައި ވަނީ 92 މީހުންނެވެ.

އެހެންކަމުން ފާއިތުވި 23 ދުވަސްތެރޭގައި ޕޮޒިޓިވްވި އަދަދު 100 އިން މަތީގައި އުޅުމަށްފަހު، މި އަދަދު މިވަނީ 100 އިން ދަށްވެފައެވެ.

މިއަދު ޕޮޒިޓިވްވި 92 މީހުންގެ ތެރެއިން މިއަދު މާލެ އިން ޕޮޒިޓިވްވީ 38 މީހުންނެވެ. އަދި މީހުން ދިރިއުޅޭ ރަށްތަކުން 51 މީހުން ޕޮޒިޓިވް ވިއިރު، ރިސޯޓްތަކުން މިއަދު ޕޮޒޓިވްވީ ތިން މީހުންނެވެ.

މިއަދުގެ ކޭސްތަކާއެކު ރާއްޖެއިން މިހާތަނަށް ރާއްޖެއިން ޕޮޒިޓިވްވި މީހުންގެ ޖުމުލަ އަދަދު ވަނީ 83،162 އަށް އަރާފައެވެ. އޭގެ ތެރެއިން މިވަގުތު ބަލި ޖެހިފައި ތިބީ 1,832 މީހަކަށެވެ. އަދި ހޮސްޕިޓަލުގައި ފަރުވާ ދެމުން ދަނީ 21 މީހަކަށެވެ.

މިއަދާ ހަމައަށް ބަލިން ރަނގަޅުވި މީހުންގެ ޖުމުލަ އަދަދަކީ 81،090 އެވެ. މި ބަލީގައި ރާއްޖެއިން މަރުވި މީހުންގެ އަދަދު ހުރީ 227 ގައެވެ.