އ.ދ. ގެ 76 ވަނަ ޢާންމު މަޖިލީހުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ތަޤްރީރުކުރައްވާ ފަލަސްތީނުގެ ރައްޔިތުންގެ ހައްޤުގުގައި އަޑުއުފުލުމުން، ފަލަސްތީނުން ރާއްޖެއަށް ޝުކުރު ދަންނަވައިފިއެވެ.
ރޭ އދ ގައި ތަޤްރީރު ކުރައްވާ ރައީސް ސޯލިހް ވިދާޅުވީ، ދިވެހި އެންމެހާ ރައްޔިތުން މިތިބީ ފަލަސްޠީނު ރައްޔިތުންނާއެކު ކަމަށާއި، ފަލަސްޠީނުގެ މިނިވަން ދައުލަތަކަށް ވަކާލާތުކުރުމުގައި ދިވެހިން އަބަދުވެސް ދެމިތިބޭނެކަމަށެވެ.
ރައީސުލްޖުމްހޫރިއްޔާ ވިދާޅުވިގޮތުގައި، އ.ދ. ގެ އެތައް އަހަރެއްގެ މަސައްކަތުންވެސް ފަލަސްޠީނު ރައްޔިތުންގެ ޙައްޤުތައް ވަނީ ކަށަވަރުކޮށް ނުދެވިކަމަށާއި، އިޒްރޭލުން ފަލަސްޠީނުގެ އަންހެން ފިރިހެން ކުދިބޮޑު އެތައް ބައެއްގެ ޙައްޤުތައް ތަކުރާރުކޮށް ނިގުޅައިގަންނަމުންދެއެވެ. ނަމަވެސް އަދުގެ ހޭލުންތެރި ޒުވާން ޖީލުގެ އެތައްބަޔަކު އެތައް ޤައުމަކުން ފަލަސްޠީނުގެ ޙައްޤުގައި ނުކުންނަނީ ބޭއިންސާފާއި ލާއިންސާނިއްޔަތަށް ނޫނެކޭ ބުނަމުންކަން އެމަނިކުފާނު ބަޔާންކުރެއްވިއެވެ.
ފަލަސްތީނުގެ ދިފާއުގައި ރައީސް ސޯލިހް ދެއްކެވި ވާހަކަފުޅު ފާހަގަކޮށް، އދ.އަށް ފަލަސްތީނުން ކަނޑައަޅާފައިވާ މިޝަންއިން ކުރި ޓްވީޓެއްގައި ރާއްޖެއަށް ވަނީ ޝުކުރު ދަންނަވާފައެވެ.
#LIVE: The high-level General Debate starts today 21 Sept. at @UN. The President of the Republic of #Maldives @MVPMNY @foreignMV uses his platform to address the unjust and illegal #occupation of #Palestine. When will our time come for freedom? Thank you Maldives. #UNGA #UNGA76 pic.twitter.com/46WcI7owGG
— State of Palestine (@Palestine_UN) September 21, 2021
ރައީސްގެ ތަގުރީރުގައި، އ.ދ. ގެ ޢާންމު މަޖިލީހާއި ސެކިއުރިޓީ ކައުންސިލުން ފަލަސްޠީނުގެ ޙައްޤުގައި ނެރުނު ޤަރާރުތަކާއި ނިންމުނު ނިންމުންތައް ގިނަ ނަމަވެސް، ފަލަސްޠީނުގެ ޙައްޤު ކަށަވަރު ނުކުރެވިވާކަން ފާހަގަކުރެއްވިއެވެ. އަދި، ކުޑަ ދައުލަތެއް ތަމްސީލު ކުރާ މީހެއްގެ ހައިސިއްޔަތުން އެމަނިކުފާނަށް މިއަދު އ.ދ. ގައި ވާހަކަފުޅުދެއްކެނީ ދުނިޔެއިން ދިވެހިރާއްޖެ ބަލައިގެންފައިވާތީ ކަމަށްވެފައި، މިލިއަނުން މީހުން ދިރިއުޅޭ ފަލަސްޠީނުގެ ރައްޔިތުން ބަލައިގަތުމުން ދުނިޔެއަށް އުނިވާ އެއްޗަކީ ކޮބައިތޯ އެމަނިކުފާނު ވަނީ ސުވާލު އުފައްދަވާފައެވެ.
މިމޭރުމުން ވާހަކަފުޅު ކުރިއަށް ގެންދަވަމުން، ދިވެހިން އެދެނީ ފަލަސްޠީނަކީ އ.ދ. އާއި މުޅި ދުނިޔެއިންވެސް މިނިވަން ޤައުމެއްގެ ގޮތުގައި ބަލައިގަންނަ ޤައުމަކަށް ވުމަށާއި، އެމީހުންނަށް އެމީހުންގެ މިނިވަންކަމާއި ޙައްޤުތަކާއި އިމްތިޔާޒާއި އިޚްތިޔާރުތައް ދޫކޮށްލުން މުހިންމުކަމުގައި ރައީސުލްޖުމްހޫރިއްޔާ ވިދާޅުވިއެވެ.
