ރާއްޖެއިން ކޮވިޑް-19 ޖެހުނު މީހުންގެ ތެރެއިން 82،101 މީހުން ބަލިން ރަނގަޅުވެއްޖެއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ)އިން އާންމު ކުރި ތަފާސް ހިސާބުގައިވާ ގޮތުން މިހާތަނަށް ރާއްޖެއިން ކޮވިޑަށް ޕޮޒިޓިވްވެފައި ވަނީ 84،017 މީހުންނެވެ. އޭގެ ތެރެއިން މިވަގުތު ބަލި ޖެހިފައި ތިބީ 1,674 މީހަކަށެވެ. އަދި ހޮސްޕިޓަލުގައި ފަރުވާ ދެމުން ދަނީ 20 މީހަކަށެވެ.
މި ބަލީގައި ރާއްޖެއިން މަރުވި މީހުންގެ އަދަދު ހުރީ 229 ގައެވެ.
ރާއްޖޭގައި ކޮވިޑްގެ ހާލަތު ރަނގަޅުވެފައި އޮތުމަށް ފަހު އަނެއްކާވެސް ހާލަތު ދަނީ ކޮންމެވެސް ވަރަކަށް ގޯސްވަމުންނެވެ. އެގޮތުން މިދިޔަ އަންގާރަ ދުވަހަކީ ޖޫން މަހުގެ 25 ވަނަ ދުވަހަށް ފަހު ރާއްޖެ އިން އެންމެ ގިނަ ބަޔަކު ކޮވިޑަށް ޕޮޒިޓިވްވި ދުވަހެއެވެ. އެދުވަހު ރާއްޖެއިން ވަނީ 220 ޕޮޒިޓިވް ކޭސް ފެނިފައިވެއެވެ.
އިއްޔެވެސް ރާއްޖެއިން ވަނީ 142 މީހަކު ކޮވިޑަށް ޕޮޒިޓިވްވެފައެވެ. ޕޮޒިޓިވް ކޭސްތައް އެންމެ ގިނައިން މިހާރު ފެންނަނީ އަތޮޅުތެރެއިންނެވެ.
