މިއަހަރުގެ ފުރަތަމަ ހަ މަސް ދުވަހުގެތެރޭ ރާއްޖެއިން މަސް އެކްސްޕޯޓް ކުރި މިންވަރު %67 އިތުރުވެފައިވާ ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އާންމުކޮށްފައިވާ ޖޫން މަހުގެ ތަފާސްހިސާބުތަކުން ދައްކައިފިއެވެ.
އެމްއެމްއޭގެ ތަފާސްހިސާބުތަކުން ދައްކާގޮތުގައި މިއަހަރުގެ ފުރަތަމަ ހަމަހުގެ ތެރޭގައި ރާއްޖެއިން 44,877.7 މެޓްރިކް ޓަނުގެ މަސް އެކްސްޕޯޓް ކޮށްފައިވެއެވެ. މިއީ މިދިޔަ އަހަރުގެ މި މުއްދަތުގައި އެކްސްޕޯޓް ކުރި 26,850.8 މެޓްރިކް ޓަނާ އަޅާބަލާއިރު 67 އިންސައްތައިގެ އިތުރުވުމެކެވެ.
އެކްސްޕޯޓް ކުރެވުނު މަހުގެ އަގަށް ބަލާއިރު، މިއަހަރުގެ ފުރަތަމަ ހަމަހު 74 މިލިއަން ޑޮލަރުގެ މަހުގެ ބާވަތްތައް އެކްސްޕޯޓް ކޮށްފައިވެއެވެ. މިއީ މިދިޔަ އަހަރުގެ މި މުއްދަތުގައި އެކްސްޕޯޓް ކުރެވުނު 52 މިލިއަން ޑޮލަރާ އަޅާބަލާއިރު 43 އިންސައްތައިގެ ކުރިއެރުމެކެވެ.
މިއަހަރުގެ މަހުން މަހަށް އެކްސްޕޯޓް ކުރެވުނު މިންވަރަށް ބަލާއިރު، އެޕްރީލް މަހު 9,700 މެޓްރިކް ޓަނާއެކު އެންމެ ގިނަ މަސް އެކްސްޕޯޓް ކުރެވިފައިވާއިރު، އެންމެ މަދު މިންވަރެއް އެކްސްޕޯޓް ކުރެވިފައިވަނީ ޖަނަވަރީ މަހު 5,710 މެޓްރިކް ޓަނެވެ.
މަސްވެރިކަމާ ބެހޭ ވުޒާރާއިން ފާހަގަކުރާ ގޮތުގައި، ސަރުކާރުގެ އަމާޒަކީ ރާއްޖޭގެ މަސްވެރިކަމުން ލިބޭ އާމްދަނީ އިތުރުކޮށް، އިޤްތިޞާދުގައި މި ސިނާޢަތުން ހިއްސާކުރާ މިންވަރު އިތުރުކުރުމެވެ. މިގޮތުން، އަންނަ 3 އަހަރު ތެރޭގައި މަސް ޕްރޮސެސިން ކެޕޭސިޓީ 9 ގުނަ އިތުރުކުރުމަށް ވަނީ ރޭވިފައެވެ.
