އެމްއެމްއޭގެ "ކަރަންސީ ގެލަރީ" ފިނޭންސް މިނިސްޓަރ އިބްރާހިމް އަމީރު ރަސްމީކޮށް ހުޅުވައިދެއްވައިފިއެވެ. މި ރަސްމިއްޔާތުގައި ކުރީގެ ގަވަރުނަރު ގާސިމް އިބްރާހިމް ވެސް ބައިވެރިވެވަޑައިގެންނެވިއެވެ.
މި ރަސްމިއްޔާތުގައި ވާހަކަ ދައްކަވަމުން އެމްއެމްއޭގެ ގަވަރުނަރު އަހުމަދު ނަސީރު ވިދާޅުވީ ކަރަންސީ ގެލަރީ ހުޅުވިގެން މިދަނީ އެމްއެމްއޭއަށް 38 އަހަރުފުރޭ މުނާސަބަތާއި ގުޅުވައިގެން ކަމަށާއި، ރާއްޖޭގެ ފައިސާފޮއްޗާއި ނޫޓު ނެރުމުގެ މަސައްކަތް ބަލަހައްޓާ އިދާރާއަކީ އެމްއެމްއޭ އަށްވާއިރު، އެމްއެމްއޭއިން ރާއްޖޭގެ ފައިސާގެ ތާރީޚް ފެންނަން ހުރުމަކީ މުހިއްމު ކަމެއްކަމަށެވެ.
އެމްއެމްއޭގެ އިމާރަތް ހެދުމަށް ޕްލޭންކުރެވިގެން ދިޔަދިޔުމުގައިވެސް އެމްއެމްއޭގައި ކަރަންސީ ގެލަރީ އެއް ހުޅުވުމުގެ ވިސްނުން ގެންގުޅެފައިވާ ކަމަށާއި މިއަދު އެކަންތައް ހަގީގަތަކަށްވުމަކީ ލިބިވަޑައިގެންނެވި ވަރަށް ބޮޑު އުފަލެއް ކަމަށް ގަވަރުނަރު ވިދާޅުވިއެވެ.
އެމްއެމްއޭ އިން ބުނީ މި ކަރަންސީ ގެލަރީ ހުޅުވުމުގެ މައިގަނޑު މަގުސަދަކީ މިހާތަނަށް ރާއްޖޭގައި ފައިސާގެ ގޮތުގައި ބޭނުންކޮށްފައިވާ ތަކެއްޗާއި، ނެރެފައިވާ ހުރިހާ ނޫޓާއި ފައިސާފޮއްޗެއް އެއްތަނަކުން ފެންނާނެގޮތް ހެދުން ކަމަށެވެ. މީގެ އިތުރުން ހަނދާނީ ފައިސާގެ ގޮތުގައި ނެރެފައިވާ ފައިސާވެސް މި ގެލަރީއިން ފެންނާނެ ކަމަށް އެމްއެމްއޭ އިން ހާމަކުރެއެވެ.
އެމްއެމްއޭގެ ގްރައުންޑްފްލޯގައި ތަރައްޤީކޮށްފައިވާ، އާއްމުންނާއި ފަތުރުވެރިންނަށްވެސް ޒިޔާރަތްކުރުމުގެ ފުރުސަތު ހުޅުވާލާފައިވާ ކަރަންސީ ގެލަރީ ހުޅުވާފައި ހުންނާނީ ބަންދުނޫން ކޮންމެ ދުވަހަކު 08:30 ން 14:00 އަށެވެ.
