2017 ޖުލައި 14 ވަނަ ދުވަހު ފުވައްމުލަކުން ގެއްލިފައިވާ އުމުރުން 43 އަހަރުގެ މުހައްމަދު ޝަފީއުގެ މައްސަލަ ތަހުގީގުކުރުމަށް، ވީނުއީއެއްނޭގި ގެއްލިފައިވާ މީހުންނާއި، މަރާލާފައިވާ މީހުންގެ މައްސަލަތައް ތަހުގީގު ކުރާ ކޮމިޝަނުގެ ޓީމެއް ފުވައްމުލަކުގައި ހަރަކާތްތެރިވާން ފަށައިފިއެވެ.
އަންގާގާ ރިސޯޓުގެ ރޫމް އެޓެންޑެންޓެއްގެ ގޮތުގައި މަސައްކަތް ކުރަމުން އައި ޝަފީއު ގެއްލިފައިވަނީ ރަށަށް ޗުއްޓީއަކަށް އައިސް އުޅުނަކޮށެވެ. ޝަފީއު ހޯދުމުގެ މަސައްކަތް ފުވައްމުލަކު ރައްޔިތުންނާއި، ފުލުހުން ގުޅިގެން ކުރި ނަމަވެސް، މިއަދާ ހަމަޔަށްވެސް އޭނާ ފެނިފައެއްނުވެ އެވެ. އޭނާގެ އަންބަކާއި ދަރިއަކު ދުނިޔޭގައި އެބަތިއްބެވެ.
އެ މައްސަލަ ބެލުމަށްޓަަކައި ފުވައްމުލަކުގައި މިހާރު ހަރަކާތްތެރިވަމުން އަންނަކަން އެ ކޮމިޝަނުން ހާމަކޮށްފައިވަނީ، އެމައްސަލަ އަލުން ބަލައިދޭން ފުލުހުންނަށް ގޮވާލާ މީހަކު ކޮށްފައިވާ ޓުވީޓަކާއި ގުޅިގެން އެ ކޮމިޝަނުން ކޮށްފައިވާ ޓްވީޓަކުންނެވެ. އަދި އެކަމުގެ ހަގީގަތް ހޯދުމަށް ކުރެވެން ހުރި ހުރިހާ މަސައްކަތެއް ކުރާނެ ކަމުގެ ޔަގީންކަން ދޭ ކަމަށްވެސް އެ ކޮމިޝަނުން ވަނީ ވިދާޅުވެފައެވެ.
މަރުތައް ބަލާ ކޮމިޝަނަށް ދާދި ފަހުން ވަނީ ޤާނޫނީ ބާރުވެެރިކަން ދީފައެވެ.
