މޯލްޑިވްސް މަނިޓަރީ އޮތޯރިޓީ އިން ދުވަހަކުވެސް މިނިވަން ކަމާއެކު މަސައްކަތްކޮށް ސަރުކާރުގެ ނުފޫޒުން އެއްކިބާވެ އަމިއްލަ އަށް ފައިސާގެ ސިޔާސަތު އެކުލަވާލާ ހިންގާފަ ނުވާކަމަށް ކެންދޫ ދާއިރާގެ މެންބަރު ޢަލީ ޙުސައިން ވިދާޅުވެއްޖެއެވެ.
ޢަލީ ހުސައިން މިހެން ވިދާލުވެފައި މި ވަނީ އެމްއެމްޕީއާރުސީގެ ބޮޑު ޚިޔާނާތުގެ އިނގިލި ބީއެމްއެލްއާއި، އެމްއެމްއޭ އަށްވެސް ދިއްކުރެވެމުން ދާ ދުވަސް ކޮޅެއްގައެވެ. އަދި މަޖިލީހުގައިވެސް މި މައްސަލަ ހޫނުވެ ވަނީ ގިނަ ބަހުސްތައް ކުރެވިފައެވެ.
އަލީ ޙުސައިން ވިދާޅުވެފައި ވަނީ ބޮޑެތި ޚިޔާނާތާއި ވައްކަން ބެންކް ތައް މެދުވެރިކޮށް ކުރުން ހުއްޓުވުމަށް ފުރަތަމަ ކުރަންޖެހޭ ކަމަކީ މިނިވަން މަރުކަޒީ ބެންކް އެއް އުފެއްދުންކަމަށެވެ.
ޚިޔާނާތުގެ މައްސަލާގައި ބީއެމްއެލް އިން ކޮށްފައިވާ މުޢާމަލާތްތައް ދިފާއުކޮށް، ޑެޕިއުޓީ ޗީފް އެގްޒެކެޓިވް އޮފިސަރު މުހައްމަދު ޝަރީފް ވަނީ މާލިއްޔަތު ކޮމެޓީގައި ވާހަކަފުޅުވެސް ދައްކަވާފައެވެ. މި މައްސަލައިގެ އިޙްމާލުވެފައި ވާކަމަށް ބުނެ އެމްއެމްއޭގައި އޮންނަ ފައިނޭންޝަލް އިންޓެލިޖެންސް ޔުނިޓް (އެފްއައިޔޫ) އަށް ޝަރީފް ފާޑުވިދާޅުވެފައެވެ.
ގަވަރުނަރު އަޙްމަދު ނަޞީރުއަށް ކުރެވޭ މިފަދަ ބޮޑެތި ތުހުމަތު ތަކާހުރެ އޭނާ ވަނީ ދާދި ފަހުން (އެމްއެމްއޭ)ގެ ގަވަރުނަރުކަމުގެ މަގާމުން އިސްތިއުފާ ދެއްވާފައެވެ.
