ހއ. ބާރަށުގެ އެއް އާއިލާއަކަށް ނިސްބަތްވާ ދެ މީހަކު މިދިޔަ އަންގާރަ ދުވަހު ނިޔާވި އިރު، އެތަނުން އެކެއްގެ މަރާމެދު ސުވާލު އުފެދޭ ކަންކަން ހުރުމުން ފުލުހުން ތަހުގީގު ކުރި ޢަލިމަނިކުގެ މަރަކީ ގުދުރަތީ މަރެއް ކަމަށް ބެލެވޭކަމަށް ފުލުހުން ވިދާޅުވެއްޖެއެވެ.
ކުއްލި ގޮތަކަށް ނިޔާވެފައިވަނީ ބާރަށު ފާތިމަތު މޫސާ އާއި އޭނާގެ ފިރިމީހާގެ އެއްބަނޑު އެއްބަފާ މީހެއްގެ ދަރިއެއްކަމަށްވާ އަލީ މުހައްމަދު (އަލި މަނިކު) އެވެ.
މަޢުލޫމާތު ލިބިފައިވާ ގޮތުގައި އަލީ މުހައްމަދުގެ ހަށިގަނޑު ފެނުން އިރު މޫނުމަތީގައި ޒަޚަމްތަކެއް ހުއްޓެވެ. އެގޮތުން ކޯމަތީގައި ތަންކޮޅެއް ހަލާކުވެފައި ހުރި އިރު ނޭފަތުގެ ކަށިގަނޑު މަތިންވެސް ވެސް ތަނެއް ހަލާކުވެފައި ހުއްޓެވެ.
ފުލުހުން ރޭ ވިދާޅުވީ، 52 އަލިމަނިކުގެ ހަށިގަނޑު ސަހަރާއަށް ގެންގޮސްފައި ވަނިކޮށް ހަށިގަނޑުގައި ޒަހަމްތަކެއް ހުރިކަމަށް އާއިލާއަށް ފާހަގަކުރެވިގެން 2019 ޖުލައި 30 ވަނަ ދުވަހުގެ 1445 ހާއިިރު ފުލުހުންނަށް ރިޕޯޓް ކޮށްފައިވާ ކަމަށެވެ.
"މިހާތަނަށް ބެލި ބެލުމުން މިއީ ގުދުރަތީ މަރެއް ކަމަށް ބެލެވޭ." ފުލުހުން ވިދާޅުވިއެވެ.
ފުލުހުން އިތުރަށް ވިދާޅުވީ، މިގޮތަށް ހުށަހެޅޭ ކޮންމެ މަރުގެ މައްސަލައެއްގައިވެސް ފުލުހުން ބަލަންޖެހޭ ކަންކަން ބަލައި ރެކޯޑްކުރާނެ ކަމަށެވެ.
