ކުޑަ ބަދަލަކާއެކު ދިހަ ރުފިޔާ އާއި ސަތޭކަ ރުފިޔާގެ އައު ޗާޕެއް ދައުރުވާ ފައިސާގެ ތެރެއަށް ނެރެފިއެވެ. 

ސޮޔާއި ތާރީޚުގެ ބަދަލަކާއެކު ދައުރުވާ ފައިސާގެ ތެރެއަށް ނެރެފައިވަނީ، އަލުން ޗާޕުކުރަން ޖެހޭ ވަރަށް ސްޓޮކް ދަށްވުމުން، 5 ޖުލައި 2018 ގައި އަލުން ޗާޕުކޮށްގެން ރާއްޖެއަށް ގެނެސް ދައުލަތުގެ ޚަޒާނާގައި ރައްކާކޮށްފައިވާ 10 ރުފިޔާ އަދި 100 ރުފިޔާގެ ނޫޓެވެ.

ދާދިފަހުން ގަވަރަނަރުކަމުން އިސްތިއުފާދެއްވި އަޙްމަދު ނަސީރު އައު ޗާޕުގައި ސޮއި ކުރައްވާފައިވާއިރު، މީލާދީ ތާރީޚުގެ ގޮތުގައި 10 މާރިޗު 2018 އަދި ހިޖުރީ ތާރީޚުގެ ގޮތުގައި ހިމަނާފައިވަނީ، 22 ޖުމާދަލްއާޚިރާ 1439 އެވެ. 

މަރުކަޒީ ބޭންކު، އެމްއެމްއޭއިން ވިދާޅުވީ އަލަށް ޗާޕުކޮށްގެން ނެރުނު 10 ރުފިޔާއާއި 100 ރުފިޔާގެ ނޫޓާއެކު މިހާރު ދައުރުވަމުންދާ 10 ރުފިޔާ އަދި 100 ރުފިޔާގެ ނޫޓުވެސް ދައުރުވަމުން ދާނެކަމަށެވެ. 

ރާއްޖޭގެ މިނިވަންކަމަށް 50 އަހަރު ފުރުމާ ދިމާކޮށް ރާއްޖޭގައި ކުރިން ބޭނުން ކުރަމުން އައި ނޫޓުތައް އުވާލާ ރަންދިހަ ފަހެއްގެ އައު ނޫޓް ސީރީޒްއެއް ތަޢާރަފުކޮށްފައިވާއިރު، މިނޫޓްތައް ހަދާފައިވަނީ ސެކިއުރިޓީ ފީޗާސްތައް ވަރަށް ވަރުގަދަކޮށް ޕޮލިމާ ކަރުދާހުގައެވެ.

ރަން ދިހަ ފަހެއް ނޫޓު ސީރީޒްގައި ހިމެނެނީ 5ރ، 10ރ، 20ރ، 50ރ، 100ރ، 500ރ އަދި 1،000 ރުފިޔާގެ ނޫޓުތަކެވެ.