މޯލްޑިވްސް މަނިޓަރީ އޮތޯރިޓީ ގަވަރުނަރަކަށް އަލީ ހާޝިމް އައްޔަން ކުރަން ރައީސް އިބްރާހިމް މުހައްމަދު ސާލިހު ރައްޔިތުންގެ މަޖިލީހަށް ނަން ފޮނުވަފިއެވެ.
ރައީސުޖުމްހޫރިއްޔާގެ ތަރުޖަމާނު އިބްރާޙިމް ހޫދު މިއަދު ކުރެއްވި ޓްވީޓެއްގައި ވިދާޅުވީ، ހާޝިމް އެމްއެމްއޭގެ ގަވަރުނަރުކަމަށް އައްޔަން ކުރުމަށް، އޭނާ ނަން ރައީސް ސާލިހު މަޖިލީހަށް ފޮނުއްވާފައިވާ ކަމަށެވެ.
އޭނާ މަގާމަށް އައްޔަން ކުރެވޭނީ ރައްޔިތުންގެ މަޖިލީހުން ރުހުން ދިނުމުންނެވެ.
އަލީ ހާޝިމަކީ ކުރީގެ ރައީސް މުހައްމަދު ނަޝީދުގެ ވެރިކަމުގެ ފުރަތަމަ ފައިނޭންސް މިނިސްޓަރެވެ. އޭނާ އެ މަގާމު އަދާ ކުރެއްވީ 2008 ވަނަ އަހަރުން 2010 ވަނަ އަހަރާ ހަމައަށެވެ.
ކުރިން ގަވަރުނަރުގެ މަގާމުގައި ހުންނެވީ އަހުމަދު ނަސީރުއެވެ. އޭނާ އެ މަގާމުން އިސްތިއުފާ ދީފައި ވަނީ، ޖުލައި 24 ވަނަ ދުވަހުއެވެ.
ނަސީރު މަގާމުން އިސްތިއުފާ ދެއްވާފައި މިވަނީ ފައިނޭންޝަލް އިންޓެލިޖެންސް ޔުނިޓް (އެފްއައިޔޫ) ގެ ވެރިޔަކަށް ކުރިން ހުންނެވި އަބްދުﷲ އަޝްރަފް ނަސީރަށް ތުހުމަތުތަކެއް ކޮށް ރައްޔިތުންގެ މަޖިލީހަށް މައްސަލައެއް ހުށަހަޅާފައި ވަނިކޮށެވެ.
