ރާއްޖޭގެ މަސް ދޯންޏެއް އިންޑިއާގެ ކަނޑުގެ ސިފައިން ހިފަހައްޓައިފި އެވެ.
އިންޑިއާ ކަނޑުގެ ސިފައިން ހިފަހައްޓަފައިވަނީ "އަންބަރީ" ނަމަކަށް ކިޔާ ދޯންޏެކެވެ. މި ދޯނި ހިފަހައްޓާފައިވަނީ އިންޑިއާ ކަނޑުގެ ސަރަހައްދުން މަލިކު ކައިރިންނެވެ.
މި ނޫހަށް އިނގިފައިވާ ގޮތުގައި މިހާރު އެ ދޯނި އޮތީ އިންޑިއާ ސިފައިންގެ ބެލުމުގެ ދަށުގައެވެ. އަދި އެ މައްސަލަ އިންޑިއާގެ މެރިން ޕޮލިސްއިން ދަނީ ބަލަމުންނެވެ.
މަލިކުގައިހުރި މިނޫހުގެ ކިޔުންތެރިޔަކު ވިދާޅުވީ، އިންޑިއާ ކަނޑުގެ ސިފައިން ހިފަހައްޓަފައިވަނީ "އަންބަރީ" ނަމަކަށް ކިޔާ މިދޯނީގައި 11 މީހުން ތިބިކަމަށާއި، މިދޯންޏަކީ ށ.ކޮމަންޑޫ ދޯންޏެއްކަމަށެވެ. ދޯނީގައި ތިބި 11 މީހުން ތިބީ ސަލާމަތުން ކަމަށްވެސް އެކިޔުންތެރިޔާ ވަނީ މިނޫހަށް މައުލޫމާތު ދީފައެވެ.
އެމްއެންޑީއެފް އިން މިކަމާއި ގުޅިގެން ވިދާޅުވީ، މަސްދޯޏެއް ހާލުގައި ޖެހިގެން މިހާތަނަށް އެމްއެންޑީއެފް ގުޅާފައި ނުވާކަމަށެވެ.
މީގެ ކުރިންވެސް އިންޑިއާ ކަނޑުގެ ސަރަހައްދުން ރާއްޖޭގެ މަސް ދޯނި ފަހަރު ވަނީ ހިފަހައްޓާފައެވެ.
