މޯލްޑިވިއަން ޑިމޮކްރަސީ ނެޓްވޯކް (އެމްޑީއެން) ގެ ރިޕޯޓް ކިޔައިފިން ކަމަށާއި، އޭގައި ނުރަނގަޅު ވާހަކަތަކެއް އެބަހުރި ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ނަޝީދު ކުރެއްވި ޓްވީޓެއްގައި ވިދާޅުވީ އެރިޕޯޓްގައި ނުރަނގަޅުކޮށް ކަންކަން ހުރިކަން ފާހަގަކުރައްވާ ކަމަށެވެ.
"އެއިން އެއް ކަމަކީ މާތްﷲ އާއި ކީރިތި ރަސޫލާއާއި ބެހޭގޮތުން އެކަށީގެން ނުވާ ބަސްތައް ގެނެވިފައިވުން. އެއީ މުސްލިމުން ކޮށްގެން ވާނެ ކަމެއް ނޫން." ނަޝީދު ޓްވީޓްގައި ބުނެފައިވެއެވެ.
ނަޝީދު އިތުރަށް ވިދާޅުވީ، އިސްލާމްދީނުގައި ކަންކަން އޮންނަ ގޮތާއި ގުޅޭގޮތުން ލިޔެފައިވާ ވާހަކަތަކަކީ ދީން ދެނެވަޑައިގަންނަވާ ބޭފުޅުން ބަހުސް ކުރައްވާ ނުކުތާތައް ކަމަށާއި، އެފަދަ ކަންކަމަށް އާއްމު މީހުން ވާހަކަ ދެއްކުން ރަނގަޅެއް ނުވާނެ ކަމަށެވެ.
އެމްޑީއެން އިން “ޕްރިލިމިނަރ އެސެސްމަންޓް އޮން ރެޑިކަލައިޒޭޝަން އިން ދަ މޯލްޑިވްސް” ގެ ނަމުގައި ނެރުނު ބަޔާނުގެ މައްސަލަ ހޫނުވެފައި މިވާ ދަނޑިވަޅުގައި ސިޔާސީ ފަރާތްތަކުންނާއި އަދި އާންމު ގިނަ ރައްޔިތުންދަނީ މިޖަމިއްޔާއަށް ފިޔަވަޅު އެޅުމަށް ގޮވާލަމުންނެވެ.
މިރިޕޯޓުގެ މައްސަލަ ފުލުހުން ބަލަމުންދާކަން ހާމަކޮށްފައި ވީނަމަވެސް މިޖަމިއްޔާއާއި ދެކޮޅަށް ސަރުކާރުން އެއްވެސް ފިޔަވަޅެއް އަޅާނެކަން ނުވަތަ ނާޅާނެކަންވެސް ހާމަކޮށްފައެއް ނުވެއެވެ. އަދި މިމައްސަލައިގައި ރައީސުލް ޖުމްހޫރިއްޔާ އިބްރާހިމް މުހައްމަދު ސޯލިހް ހަނު ހުންނަވާ މައްސަލައިގައިވެސް ގިނަ ބަޔަކުދަނީ ރައީސް އަށް ފާޑުވިދާޅުވަމުންނެވެ.
