އައްޑޫ ސިޓީ ލިންކް ރޯޑުގައި ނުރައްކާތެރި އެކްސިޑެންޓެއް ހިނގައިފިއެވެ.
މި އެކްސިޑެންޓްގައި ފަސް މީހަކަށް ވަނީ އަނިޔާލިބިފައެވެ. މި އެންމެންނަކީ ވެސް ބިދޭސީންނެވެ.
މި އެކްސިޑެންޓް ހިނގާފައިވަނީ ލިންކް ރޯޑްގައި ދުއްވާފައި ދިޔަ ޕިކަޕެއްގެ ޓަޔަރު ފަޅައިގެން ގޮސް ކޮންޓްރޯލުން ނެއްޓުމުގެ ސަބަބުންނެވެ. މި އެކްސިޑެންޓްގައި އެ ޕިކަޕް ފުރޮޅާލައި، އެވަގުތު އޭގައި އެންމެންނަށްވެސް ވަނީ އަނިޔާ ލިބިފައެވެ.
ފުލުހުން ވިދާޅުވި ގޮތުގައި މި އެކްސިޑެންޓްގެ މަޢުލޫމާތު ފުލުހުންނަށް ލިބިފައިވަނީ މިއަދު މެންދުރު 13:00 އެހާކަންހާއިރުއެވެ.
މި އެކްސިޑެންޓްގައި ޕިކަޕްގެ އެތެރޭގައި ތިބި 2 މީހުންނަށް ސީރިއަސް އަނިޔާތަކެއް ވަނީ ލިބިފައެވެ. އަދި ޕިކަޕްގެ ފަހަތުގައި ތިބި 3 މީހުންނަށް ވަނީ އެކިވަރުގެ އަނިޔާލިބިފައެވެ.
މި އެކްސިޑެންޓްގައި އަނިޔާ ލިބުނު ފަރާތްތަކަށް ހިތަދޫ ރީޖަނަލް ހޮސްޕިޓަލުގައި މިހާރު ދަނީ ފަރުވާ ދެމުންނެވެ.
