މާލޭ، ހެންވޭރު ގެއެއްގައި ނިޔާވެފައި އޮތް ޒުވާނަކު ފެނިއްޖެއެވެ.
ފުލުހުން ވިދާޅުވީ، ހެންވޭރުގައި ހުންނަ ގެއެއްގައި ރޭ ނިދިގޮތަށް ޚަބަރެއް ނުވެގެން ބެލިއިރު، އެމީހާ ނިޔާވެފައި އޮތް މައްސަލައެއް ފުލުހުންނަށް ހުށަހެޅިފައިވާ ކަމަށެވެ.
"މާލެ، ހެންވޭރުގައި ހުންނަ ގެއެއްގައި ރޭ ނިދިގޮތަށް ޚަބަރެއް ނުވެގެން އާއިލާއިން ބެލިއިރު މީހަކު މަރުވެފައި އޮތް މައްސަލައެއް މިއަދު ހެނދުނު 10:24 ހާއިރު ފުލުހުންނަށް ހުށަހެޅިފައިވޭ." ފުލުހުން ވިދާޅުވިއެވެ.
ފުލުހުން ވިދާޅުވީ، ނިޔާޥެފައިވަނީ އުމުރުން 28 އަހަރުގެ ދިވެހި ފިރިހެނެއް ކަމަށާއި، މި މައްސަލައާއި ގުޅިގެން ބަލަންޖެހޭ ކަންކަން ބެލުމަށް ފުލުހުން ހަރަކާތްތެރިވަމުން އަންނަ ކަމަށެވެ.
މި ނޫހަށް އެނގިފައިވާ ގޮތުގައި އެ ގެޔަކީ އަނިޔާވެރި ގޮތަކަށް މަރާލެވިފައިވާ ޔާމީން ރަޝީދުގެ މަރުގެ މައްސަލާގައި ދައުވާ އުފުލާފައިވާ ފަރާތެއްކަމުގައިވާ އިސްމާއިލް ހައިޝަމް ރަޝީދު ނިސްބަތްވާ ގެއެވެ.
ނަމަވެސް ނިޔާވެފައިވަނީ ކާކުކަމެއް އަދި ފުލުހުން ހާމަކޮށްފައެއް ނުވެއެވެ. ނިޔާވެފައިވާ ޒުވާނާގެ ގައިން އަނިޔާ ކޮށްފައިވާ ކަމުގެ ނިޝަންތައް ފެންނަށް ހުރިކަމަށް ވަނީ މަޢުލޫމާތު ލިބިފައެވެ.
އެ ގެއަކީ މީގެ ކުރިންވެސް މަރުގެ ހާދިސާއެއް ހިނގާފައިވާ ގެއެކެވެ.
