މާލޭގައި އިމާރާތްކުރަމުންދިޔަ ގެއެއްގެ މަތިން ވެއްޓުނު ސިމެންތި ބަސްތާއަކުން ޖެހި ރައުޝާން ޖިއާން މަރުވި ހާދިސާއާ ގުޅިގެން ހަ މީހެއްގެ މައްޗަށް ދައުވާކޮށްފިއެވެ.
ޕްރޮސެކިއުޓަރ ޖެނެރަލްގެ އޮފީހުން ނެރުއްވި ނޫސް ބަޔާނެއްގައި ވިދާޅުވީ، ހަ މީހުންގެ މައްޗަށް ދައުވާކުރިއިރު، ހަތަރު ދައުވާއެއް އުފުލާފައިވާ ކަމަށެވެ.
ޕްރޮސެކިއުޓަރ ޖެނެރަލްގެ އޮފީހުން ދައުވާ އުފުލާފައިވަނީ ދެ ދިވެހިންނާއި، އިންޑިއާގެ ހަތަރު ރައްޔިތުންގެ މައްޗަށެވެ.
ދައުވާ އުފުލާފައިވާ ދެ ދިވެހިންނަކީ މާލޭ ދަފްތަރު 8424، މޫސާ ހަސަން އާއި، މާލޭ ދަފްތަރު 7198 އާދަމް ޝަފީޤެވެެ. މި ދެ މީހުންގެ މައްޗަށް އުފުލާފައިވަނީ، މީހަކު މަރުވެދިޔުމުގެ އިހުމާލުގެ އަމަލެއް ކުރުމުގެ ކުށުގެ ދައުވާއެވެ.
ދައުވާ އުފުލާފައިވާ އިންޑިއާގެ ރައްޔިތުންގެ ތެރެއިން ރައްޖާވް ޢަލީގެ މައްޗަށް ދައުވާ އުފުލާފައިވަނީ، މީހަކު މަރުވެދިޔުމުގެ ފަރުވާކުޑަ އަމަލެއް ހިންގުމުގެ ކުށުގެ ދައުވާއެވެ. އަދި މުތުމަނި ރަމަޗުންދުރަންގެ މައްޗަށ އުފުލާފައިވަނީ، މީހަކު މަރުވެދިޔުމުގެ ފަރުވާކުޑަ އަމަލެއް ހިންގުމުގައި ބައިވެރިވުމުގެ ކުށުގެ ދައުވާއެވެ.
ދައުވާ އުފުލާފައިވާ އިންޑިއާގެ ދެ ރައޔިތުން ކަމަށްވާ ކެސަރިލަލް ޗައުހަން އަދި ގުލަމް މަހަމަދުގެ މައްޗަށް ޕީޖީ އޮފީހުން އުފުލާފައިވަނީ، ކުރިމަތިވެދާނެކަން އެނގޭ ނުރައްކަލެއްގެ އިންޒާރު އެކަށީގެންވާ ސަބަބެއްނެތި ނުރައްކާތެރިކަމެއްވައިވާ މީހާއަށް ނުދިނުމުގެ ކުށުގެ ދައުވާއެވެ.
ޕީޖީގެ ބަޔާނުގައި ބުނެފައިވަނީ، މޫސާ ހަސަން، ޑަބްލިޔު ކޮންސްޓްރަކްޝަނުގެ ސީނިއަރ ސައިޓް ސްޕަވައިޒަރެއްގެ މަޤާމުގައި ހުރެ، އަދި އާދަމް ޝަފީޤް އެ ކުންފުނީގެ މެނޭޖިންގ ޑިރެކްޓަރުގެ މަޤާމުގައި ހުރެ، މި ދެފަރާތުގެ ބެލުމުގެ ދަށުން އިމާރާތުގެ ބޭރުން ފަރީދީމަގަށް ޖަމާކޮށްފައިހުރި ހިލަ ބަސްތާތަކާއި، ސިމެންތި ބަސްތާތަށް ސަވާޖީއެއް ބޭނުންކޮށްގެން ވިްނޗުގެ އެހީގައި ނުވަވަނަ ފަންގިފިލާއަށް އެރުވިއިރު އަޅަންޖެހޭ ސަލާމަތީ ފިޔަވަޅުތައް އެޅުމުގައި އިހުމާލުވެފައިވާތީ ކަމަށެވެ.
