އަވަށްޓެރި އިންޑިޔާގެ ވެރިރަށް ނިއު ދިއްލީގެ ވައި، އިންތިހާ ދަރަޖައަށް ނުސާފުވެފައިވާއިރު، އެކަމުގެ ސަބަބުން އެސިޓީގެ ވައިގެ ދަތުރުފަތުރަށް ބުރޫ އަރައިފިއެވެ.
ދިވާލީ އަށްފަހު ވައި ނުސާފުވުން އިތުރުވެފައިވާއިރު، މިކަމުގެ ސަބަބުން، އިންދިރާ ގާންދީ އިންޓަނޭޝަނަލް އެއަރޕޯޓުގެ ބައެއް ދަތުރުތައް ޑިލޭވެ، ބައެއް ފްލައިޓުތައްވަނީ ޑައިވާޓްވެސް ކޮށްލާފައެވެ. އެގޮތުން، 37 ދަތުރަކަށް ބުރޫ އަރާފައިވާއިރު، އޭގެތެރޭގައި ބައިނަލްއަޤުވާމީ އެއް ދަތުރުވެސް ހިމެނެއެވެ.
ވައި ނުސާފުވުމުގެ ސަބަބުން، ވިޒިބިލިޓީ ނުވަތަ ފެންނަ މިންވަރު ދަށްވުމުން، ރައްކާތެރިކަމަށްޓަކައި ފްލައިޓްތައް ކެންސަލް ކޮށްލިއިރު، މިކަން ކަމާ ބެހޭ ފަރާތްތަކުން މީޑިޔާ އަށް ކަށަވަރުކޮށްދީފައިވެސްވެއެވެ.
ވައި ތަޣައްޔަރުވުން މިން ކުރާ އެކި އިންޑެކްސްތަކުން، އިއްޔެ ދިއްލީގެ ވައި ތަޣައްޔަރުވެފައިވަނީ އިންސާނުން ނޭވާލުމަށް އެއްގޮތަކަށްވެސް އެކަށީގެން ނުވާ މިންވަރަކަށް ކަމަށް ފާހަގަކޮށްފައިވެއެވެ.
މިކަމާ ގުޅިގެން ދިއްލީގެ ޗީފް މިނިސްޓަރު، އަރްވިންދު ކެޖްރިވާލުވެސް ވިދާޅުވެފައިވަނީ ނޭވާލާން ރައްކާތެރި ނުވާ މިންވަރަށް އުތުރު އިންޑިޔާ ސަރަޙައްދުގެ ވައި ތަޣައްޔަރުވެފައިވާކަމުގައެވެ.
18 މިލިޔަން މީހުން ދިރިއުޅެމުން އަންނަ ދިއްލީއަކީ، ދުނިޔޭގެ އެންމެ ވައި ތަޣައްޔަރުވެފައިވާ ސިޓީކަމުގައި، "ގްރީންޕީސް" އިން އެކުލަވާލި ރިޕޯޓެއްގައި ބަޔާންކޮށްފައިވެއެވެ. ދިވާލީގައި ބޭނުންކުރާ ފަޓާސްފަދަ އެއްޗެހީގެ ސަބަބުންނާއި، މި ދުވަސްވަރަކީ ދިއްލީ ސަރަޙައްދުގެ ދަނޑުތައް ރޯކުރާ ދުވަސްވަރުކަމުން، އިންތިހާ ދަރަޖައަށް ވައި ތަޣައްޔަރުވާން މަގުފަހިކުރުވައެވެ.
