ރޭ ހުޅުމާލޭގައި ހިނގި އެކްސިޑެންޓްގައި ނިޔާވި ކުއްޖާގެ ޖަނާޒާ މިއަދު މެންދުރު ނަމާދަށްފަހު ބޭއްވުމަށް ނިންމައިފިއެވެ.
ރޭ ހިނގި ނުރައްކާތެރި އެކްސިޑެންޓްގައި ނިޔާވެފައިވަނީ ކ. ތުލުސްދޫ، ބޮނަސޭރާ، ފާތިމަތު އަންޖުމް ޝަފީގް ،13، އެވެ.
އަންޖުމްގެ ކަށުނަމާދު ކުރުން އޮންނާނީ މިއަދު މެންދުރު ނަމާދަށް ފަހު ހުޅުމާލޭ ވަގުތީ މިސްކިތުގައެވެ.
އަންޖުމް ނިޔާވެފައިވަނީ ރޭ 22:40 ހާއިރު ހުޅުމާލޭ ނިރޮޅުމަގުން އައިސް ހައިވޭއަށް އަރާ ހިސާބު ޓާމިނަލް ކައިރިން ސައިކަލަކާއި، އެމްޓީސީސީގެ ބަހެއް ޖެހި އެކްސިޑެންޓްގައެވެ. އެކްސިޑެންޓްވިއިރު އަންޖުމް އިނީ އެކްސިޑެންޓްވި ސައިކަލުގެ ފަހަތު ޝީޓްގައެވެ.
ފުލުހުން ވިދާޅުވީ، އެކްސިޑެންޓްވުމުން ބަސް މަޑުނުކޮށް ގޮސްފައިވާ ކަމަށާއި، ބަސް ހުއްޓުވާފައިވަނީ ހައިވޭގެ ޔޫޓާރން ނަގާ ހިސާބުން ކަމަށާއި، މި އެކްސިޑެންޓްގައި އަނިޔާވި 51 އަހަރުގެ އަންހެން މީހާގެ ހާލު ސީރިއަސް ނޫންކަމަށެވެ.
