ރޭ ހުޅުމާލޭގައި ތޫނު އެއްޗަކުން ހަމަލާދީ ވަރަށް ބޮޑަށް ޒަޚަމްކޮށް މަރާލި ޤާސިމް ޙަސަންގެ މަރު ދިވެހި ޑްރައިވަރުންގެ ޖަމްޢިއްޔާއިން ކުށްވެރިކޮށްފިއެވެ.
މިކަން ކުށްވެރިކޮށް އެޖަމްޢިއްޔާއިން ނެރުނު ނޫސްބަޔާނުގައި ވިދާޅުވީ، 04 ޑިސެމްބަރ 2019 ވަނަ ދުވަހުގެ ރޭ ހުޅުމާލޭގައި ރަހުމްކުޑަ އަނިޔާވެރި ހަމަލާއެއްގައި އދ.މާމިގިލި / ހ.ނާޝާ- މާލެ، ޤާސިމް ޙަސަން ނިޔާވެފައިވާތީ އެކަން" ދިވެހި ޑްރައިވަރުންގެ ޖަމްޢިއްޔާ " ގެ ފަރާތުން އެންމެ ހަރުކަށި އިބާރާތުން ކުއްވެރިކުރާކަމަށެވެ.
އަދި މި އަނިޔާވެރި ލާއިންސާނީ ޢަމަލު ހިންގި މީހުން ހޯދާ އެމީހުންނަށް އިސްލާމްދީންގައި އަންގަވާފައިވާ ޙުކުމް ޤާއިމްކޮށްދެއްވުމަށް ސަރުކާރާއި ކަމާބެހޭ އެންމެހާއި މުއައްސަސާތަކަށް އެޖަމްޢިއްޔާގެ މިބަޔާނުގައި ގޮވާލާފައިވެއެވެ.
މަޢުލޫމާތު ލިބޭގޮތުގައި، ހުޅުމާލޭ ހިތިގަސް މަގުގައި، ޒަޚަމްތަކަކާ އެކު ވެއްޓިފައިވާ ޤާސިމް ޙަސަން ހުޅުމާލެ ހޮސްޕިޓަލަށް ގެނެވިފައިވަނީ ރޭ 21:22 އެވެ.
