މާލޭ ގެއެއްގެ ޓެރަސްމަތީގައި ނިޔާވެފައި އޮތް މީހަކު ފެނިއްޖެއެވެ.
މީހަކު ނިޔާވެފައި އޮއްވާ ފެނިފައިވަނީ މއ. ޓޮމާޓޯ ގޭގެ ޓެރަސްމަތީގައި ކަމަށް ސަލާމަތީ ބާރުތަކުން ވަނީ ވިދާޅުވެފައެވެ.
ފުލުހުން ވިދާޅުވީ، މައްޗަންގޯޅި ގެއެއްގެ ޓެރަސްމަތީގައި ފިރިހެނަކު ވެއްޓިފައި އޮތްކަމުގެ މަޢުލޫމާތު މިއަދު ހެނދުނު 11:18 ހާއިރު ފުލުހުންނަށް ލިބިފައިވާ ކަމަށެވެ.
"މަޢުލޫމާތު ލިބުމާއި ގުޅިގެން ފުލުހުން އެގެއަށް އެޓެންޑް ވިއިރު އެމީހާގެ އަނގައިން ފޮނު އަރާފައިވޭ." ފުލުހުން ވިދާޅުވިއެވެ.
ފުލުހުން ވިދާޅުވީ، އެމްއެންޑީއެފްގެ އެހީތެރިކަމާއެކު އެމީހާ ތިރިއަށް ބާލާ ހޮސްޕިޓަލަށް ގެންދިއުމުގެ މަސައްކަތް ކުރަމުންދާ ކަމަށެވެ.
"މއ. ޓޮމާޓޯގޭގެ ޓެރަސް މަތީގައި އޮތް މީހަކު ތިރިއަށް ބޭލުމުގައި އެމްއެންޑިއެފް ފަޔަރ އެންޑް ރެސްކިއު ސަރވިސްއިން ހަރަކާތްތެރިވާންފަށައިފި. މި އިމާރާތަކީ ތިން ބުރިއަށް ހަދާފައިވާ އިމާރާތެއް. މިހާދިސާގެ މަޢުލޫމާތު ފަޔަރ އެންޑް ރެސްކިއު ސަރވިސްއަށް ލިބިފައިވަނީ މިއަދު 11:34 ހާއިރު، ޕޮލިސް ކޮމާންޑް ސެންޓަރުން." އެމްއެންޑީއެފް އިން ވިދާޅުވިއެވެ.
ޓޮމާޓޯގޭގެ ޓެރަސްމަތިން ފެނުނު ފިރިހެން މީހާ ނިޔާވެފައިވާކަން ރަސްމީ ފަރާތްތަކުން ކަށަވަރުކޮށް ނުދިން ނަމަވެސް، އެ މީހާ ނިޔާވެފައިވާކަން މިނޫހަށް ވަނީ ކަށަވަރު ކުރެވިފައެވެ.
މިނޫހަށް ބައެއް ފަރާތްތަކުން މަޢުލޫމާތު ދެއްވި ގޮތުގައި އެމީހާ ނިޔާވެފައި އޮއްވާ ފެނުނީ އެގޭގައި ދިރިއުޅޭ މީހަކު ޓަރަސް މަތީގައި އެއްޗެހި ހިއްކަން އަޅަން ދިޔަ ވަގުތުއެވެ. އަދި އެމީހާ ނިޔާވެފައިވަނީ އޯވާޑޯޒްވެގެން ކަމަށްވެސް ބައެއް ފަރާތްތަކުން ވަނީ ބުނެފައެވެ.
ނިޔާވެފައިވަނީ ކާކުކަން މިހާތަނަށް ދެނެގަނެވިފައި ނުވާ ކަމަށާއި، އެމީހާއަކީ ކާކުކަން ދެނެގަތުމުގެ މަސައްކަތް ކުރަމުން އަންނަކަމަށް ފުލުހުން ވިދާޅުވިއެވެ.
