އަނިޔާވެރި ގޮތަކަށް ހުޅުމާލޭގައި މަރާލި ޓެކްސީ ޑްރައިވަރުގެ، މަރުގެ މައްސަލައިގައި މީހަކު ހައްޔަރުކޮށްފިއެވެ.
04 ޑިސެމްބަރ 2019 ވަނަ ދުވަހުގެ ރޭ ހުޅުމާލޭގައި ރަހުމްކުޑަ އަނިޔާވެރި ހަމަލާއެއްގައި ނިޔާވެފައިވަނީ ޓެކްސީ ޑްރައިވަރެއް ކަމުގައިވާ އދ.މާމިގިލި / ހ.ނާޝާ- މާލެ، ޤާސިމް ޙަސަން އެވެ.
ޑްރައިވަރު ޤާސިމްގެ މަރުގެ ތުހުމަތުގައި މީހަކު ހައްޔަރުކޮށްފައިވާކަން ޕޮލިސް ކޮމިޝަނަރު މުޙައްމަދު ހަމީދު ވަނީ ކަށަވަރުކޮށްދެއްވާފައެވެ.
ޕޮލިސް ކޮމިޝަނަރު މުޙައްމަދު ހަމީދު ދާދި ދެންމެ ވިދާޅުވީ، ޤާސިމްގެ މަރާ ގުޅުންހުރި ފިރިހެނަކު ދިވެހި ފުލުހުން ހައްޔަރުކޮށްފައިވާ ކަމަށާއި، ފުލުހުންގެ މަސައްކަތަށް ފަހުރުވެރިވެލައްވާ ކަމަށެވެ.
މި މައްސަލައިގައި މީހަކު ހައްޔަރުކުރިކަން ފުލުހުން ކަށަވަރުކޮށްދިން ނަމަވެސް، އަދި އިތުރު ތަފްސީލު ހަމާއެއް ނުކުރެއެވެ. ސީޕީ ހަމީދު ވިދާޅުވީ، މިކަމާ ގުޅޭ އިތުރު ތަފްސީލު މާދަމާ ހާމަކުރައްވާނެ ކަމަށެވެ.
ޤާސިމް ޙަސަން މަރާލާފައި އޮއްވާ ފެނިފައިވަނީ ހުޅުމާލޭ ހިތިގަސް މަގުގައި، ޒަޚަމްތަކަކާ އެކު މަގުމަތީގައި އޮއްވާ މިމަހުގެ 4 ވަނަ ދުވަހުގެ ރޭ އިރާކޮޅުއެވެ.
ޑްރައިވަރު ޤާސިމް މަރާލި މީހުން ހޯދާ އެމީހުންނަށް އިސްލާމްދީންގައި އަންގަވާފައިވާ ޙުކުމް ޤާއިމްކޮށްދެއްވުމަށް ސަރުކާރާއި ކަމާބެހޭ އެންމެހާއި މުއައްސަސާތަކަށް ދިވެހި ޑްރައިވަރުންގެ އެޖަމްޢިއްޔާއިން ގޮވާލާފައިވެއެވެ.
