2019 ޑިސެމްބަރު 4 ވަނަ ދުވަހުގެ ރޭ ހުޅުމާލޭގައި އަނިޔާވެރި ގޮތަކަށް މަރާލި ޓެކްސީ ޑްރައިވަރުގެ މަރުގެ ތުހުމަތުގައި ފުލުހުން ހައްޔަރުކުރި މީހާ، ޤާސިމް މަރާލިކަމަށް އިއުތިރާފުވެއްޖެއެވެ.
މިކަން ހާމަކޮށްފައިވަނީ ފުލުހުންގެ ވެރިޔާ، ކޮމިޝަނަރު އޮފް ޕޮލިސް މުޙައްމަދު ހަމީދު ދާދި ދެންމެ ކުރެއްވި ޓްވީޓެއްގައެވެ.
ޕޮލިސް ކޮމިޝަނަރު މުޙައްމަދު ހަމީދު ވިދާޅުވީ، މަރާލާފައިވާ ޓެކްސީ ޑްރައިވަރު އދ.މާމިގިލި / ހ.ނާޝާ- މާލެ، ޤާސިމް ޙަސަންގެ މަރުގެ ތުހުމަތުގައި ރޭ ފުލުހުން ހައްޔަރުކޮށްފައިވަނީ، އޭނާގެ ޤާޠިލް ކަމަށާއި، އޭނާ ކުށަށް އިއުތިރާފުވެ ފުލުހުންނެ ތަޙްޤީޤަށް އެއްބާރުލުން ދޭންފަށާފައިވާ ކަމަށެވެ.
ޤާސިމް ހަސަންގެ ޤާޠިލުގެ ބަންދަށް ކްރިމިނަލް ކޯޓުން 15 ދުވަސް ޖަހައިދީފައިވާ ކަމަށްވެސް މުޙައްމަދު ހަމީދު ވަނީ ވިދާޅުވެފައެވެ.
"4 ޑިސެމްބަރުގައި ޤާސިމް މަރާލިއިރު ޤާޠިލު ލައިގެންހުރި އެއްޗެހި ވަނީ ހޯދިފައި. މި އެއްޗެހި ފޮރުވާފައިވަނީ ހާދިސާ ހިނގި ސަރަހައްދުގައި. މަސައްކަތް ކުރަމުން މިދަނީ ޤާސިމްގެ މަރުގެ މައްސަލައާއި ގުޅުންހުރި އިތުރު ހެއްކާއި ޤަރީނާ ހޯދުމަށް." ޕޮލިސް ކޮމިޝަނަރު މުޙައްމަދު ހަމީދު ވިދާޅުވިއެވެ.
ޤާސިމް ޙަސަން މަރާލާފައި އޮއްވާ ފެނިފައިވަނީ ހުޅުމާލޭ ހިތިގަސް މަގުގައި، ޒަޚަމްތަކަކާ އެކު މަގުމަތީގައި އޮއްވާ މިމަހުގެ 4 ވަނަ ދުވަހުގެ ރޭ އިރާކޮޅުއެވެ.
މި މައްސަލައާއި ގުޅޭ އިތުރު މަޢުލޫމާތު އަންނަ ހަފްތާގެ ކުރީކޮޅު ބާއްވާ ނޫސްވެރިންގެ ބައްދަލުވުމެއްގައި ހާމަކުރައްވާނެކަމަށްވެސް ޕޮލިސް ކޮމިޝަނަރު ވަނީ ވިދާޅުވެފައެވެ.
ހިޔާލު
ތީގަ ދެން އިތުރަށް ހެތްކެއް ބޭނުންވޭތަ.. ކުއް ކުރި މީހާ ތިއޮތީ ކުށައް އިއުތިރާފް ވެފަ..