ދީނުގެ ނަމުގައި ހައްދުފަހަނަ އަޅާގޮސް، ހަރުކަށި ފިކުރަށް ތާއީދު ކުރާކަމުގެ ތުހުމަތުގައި އއ. މާޅޮހުން މީހަކު ހައްޔަރުކޮށްފިއެވެ. މި މައްސަލައިގައި ހައްޔަރުކޮށްފައިވަނީ އުމުރުން 45 އަހަރުގެ ދިވެހި ފިރިހެނެކެވެ.
ފުލުހުން ދާދި ދެންމެއަކު ވިދާޅުވީ ހައްޔަރު ކުރި މީހާގެ މައްޗަށް، ހަރުކަށި ފިކުރަށް ތާއީދުކޮށް، އެފިކުރު ފެތުރުމާއި، ދަރިން ބެލުމުގައި އިހުމާލުވެ، އެކުދިން ލިބިދޭން ޖެހޭ އަސާސީ ހައްގުން މަހުރޫމުކޮށް، ބައެއް ދަރިން 18 އަހަރު ނުފުރެނީސް ކޯޓުން ބޭރުގައި ކައިވެނި ކުރުވިކަމުގެ ތުހުމަތު، މި މީހާގެ މައްޗަށް ކުރެވޭކަމުގައެވެ.
މީގެއިތުރުންވެސް ފުލުހުން ވިދާޅުވި ގޮތުގައި މި މައްސަލައިގައި މި މީހާ ހައްޔަރުކޮށްފައިވަނީ މިއަދު ހެނދުނު 11:44 ހާއިރުއެވެ.
ހަރުކަށި ފިކުރުގެ މީހަކު މާޅޮހުން ހައްޔަރުކޮށްފައިވާއިރު، މި މަހުގެ 18 ވަނަ ދުވަހު، ސަލާމަތީ ބާރުތަކުން ހިންގި އޮޕަރޭޝަނެއްގައި ރ. މަޑުއްވަރީންވެސް ވަނީ އެފިކުރުގެ ތިން މީހަކު ހައްޔަރުކޮށްފިއެވެ.
ނުރައްކާތެރި ހަރުކަށި ފިކުރުގެ ގިނަ އަދަދެއްގެ ބަޔަކު އުޅެމުންދާކަމަށް ކަމާ ބެހޭ ފަރާތްތަކުން ވަނީ ބުނެފައެވެ.
