ކުޑަކުދިންނަށް ކުރާ ޖިންސީ ގޯނާގެ 27 މައްސަލައެއް މިދިޔަ ޑިސެމްބަރު މަހު ހުށަހެޅިފައިވާކަމަށް ޖެންޑަރ މިނިސްޓްރީއިން ވިދާޅުވެއްޖެއެވެ.
ޖެންޑާ މިނިސްޓްރީން މިއަދު އާންމުކުރި މިދިޔަ ޑިސެމްބަރު މަހުގެ ތަފާސް ހިސާބު ދައްކާ ގޮތުން މިދިޔަ މަހު އެކި ބާވަތުގެ 283 މައްސަލައެއް އެ މިނިސްޓްރީއަށް ހުށަހެޅުނުއިރު އޭގެތެރެއިން 134 މައްސަލައަކީ ކުޑަކުދިންނަށް އެކި ކަހަލަ އަނިޔާކުރުމުގެ މައްސަލައެވެ.
އޭގެ ތެރޭގައި ޖިންސީ ގޯނާ ކުރުމުގެ 27 މައްސަލައެއްވެއެވެ. ކުޑަކުދިންނަށް އެކި ކަހަލަ އަނިޔާކުރުމުގެ މައްސަލައިގެ ތެރޭގައި އެންމެ ގިނައިން މިދިޔަ މަހު ޖެންޑާރއަށް ހުށަހެޅިފައިވަނީ އިޙުމާލުވުމުގެ މައްސަލަތަކެވެ. މިބާވަތުގެ 66 މައްސަލައެއް ޖެންޑާރއަށް ރިޕޯޓުކޮށްފައިވެއެވެ.
މީގެއިތުރުން ޙައްޤުތަކުން ކުޑަކުދިން މަޙްރޫމުކުރުމުގެ 17 މައްސަލައެއް ހުށަހެޅިފައިވާއިރު، އޭގެތެރޭގައި ވެކްސިން ނުދިނުމުގެ 7 މައްސަލައަކާއި، ތަޢުލީމުން މަޙްރޫމް ކުރުމުގެ 6 މައްސަލައަކާއި، އުފަންވުން ރަޖިސްޓްރީ ނުކުރާ 2 މައްސަލައަކާއި، ސިއްޙީ ފަރުވާއަށް ހުރަސްއެޅުމުގެ 1 މައްސަލައިގެ އިތުރުން މަޖުބޫރުން ކައިވެނިކުރުވުމުގެ 1 މައްސަލަ ހިމެނޭކަމަށް ޖެންޑާރއިން ވިދާޅުވިއެވެ.
މީގެއިތުރުން އާޢިލީ 30 މައްސަލައަކާއި، ގެވެށި އަނީޔާގެ 44 މައްސަލައެއް މިދިޔަ މަހު ހުށަހެޅިފައިވާކަމަށްވެސް ޖެންޑަރއިން ވިދާޅުވިއެވެ.
