ހުޅުމާލޭގައި އަނިޔާވެރި ގޮތަކަށް މަރާލާފައިވާ ޓެކްސީ ޑްރައިވަރު ގާސިމް ހަސަންގެ މަރުގެ ދައުވާ ލިބޭ އަދުހަމް މުޙައްމަދު ދައުވާއަށް އިންކާރުކޮށްފިއެވެ.
ގާސިމް ހަސަން މަރާލިކަމަށް އަދުހަމް އިންކާރުކޮށްފައި މިވަނީ ފުލުހުންގެ ތަޙްޤީޤުގައި އޭނާ ގާސިމް މަރާލިކަމަށް އެއްބަސްވެ، މި މައްސަލައިގެ ޝަރީއަތުގެ ފުރަތަމަ އަޑުއެހުމުގައިވެސް ކުށަށް އިއުތިރާފުވެ މަޢާފަށް އެދިފައިވަނިކޮށް، މިއަދު ބޭއްވި އެ މައްސަލައިގެ ދެވަނަ އަޑުއެހުމުގައެވެ.
ތޫނު އެއްޗެއް ބޭނުންކޮށްގެން ގަސްތުގައި މީހަކު މެރުމުގެ ދައުވާއަށް އިއުތިރާފުވެފައިވާތީ މިއަދު ކްރިމިނަލް ކޯޓުގައި ކުރިއަށް ގެންދިޔަ އަވަސް ނިޔާގެ އަޑުއެހުމުގައި އަދުހަމް ބުނީ، ގާސިމްގެ މަރަކީ އޭނާއަށް އެނގިގެން ހިނގި ކަމެއް ނޫން ކަމަށެވެ.
ގަސްތުގައި މީހަކު މަރަލާފައި ނުވާކަމަށާއި، އޭނާ އެ ކުށަށް އިއުތިރާފުވީ މަސްތުގެ ހާލަތުގައި ހުރެ ކަމަށްވެސް އަދުހަމް ވަނީ މިއަދުގެ ޝަރީއަތުގެ މަޖިލީހުގައި ބުނެފައެވެ. އަދި އޭނާ ވަނީ ފުލުހުން މަސްތުވާތަކެތި އޭނާއަށް ދިންކަމަށް ތުހުމަތުވެސް ކޮށްފައެވެ.
އަދުހަމް ޝަރީއަތުގައި ބުނީ މި މައްސަލައިގައި އޭނާ ހައްޔަރުކޮށް ގެންދިޔައީ އޭނާ ފޮރުވާފައިހުރި މަސްތުވާތަކެތި ހޯދަން ކަމަށާއި، އެތަކެތި ހޯދުމަށްފަހު އެ މަސްތުވާތަކެތި ބޭނުންކުރަން ފުލުހުން އޭނާއަށް މަޖުބޫރުކުރުމުގެ އިތުރުން، ފުލުހުންގެ ހަރަދުގައި މަސްތުވާތަކެތި ގަނެ އޭނާއަށް ދީފައިވާ ކަމަށެވެ.
24 ގަޑިއިރު ފުލުހުން އޭނާ ބަހައްޓަނީ މަސްތުގެ ހާލަތުގައި ކަމަށާއި، ކްރިމިނަލް ކޯޓުގައި ބޭއްވި މި މައްސަލައިގެ ފުރަތަމަ އަޑުއެހުމުގައި ކުށަށް އިއުތިރާފު ވީވެސް މަސްތުގެ ހާލަތުގައި ކަމަށް މިއަދު އަދުހަމް ބުނެފައިވެއެވެ. އޭނާ ބުނީ އޭނާއަށް ހަމަ ހޭވެރިކަން ވީ ކަރެކްޝަންސް ސަރވިސްގެ ބެލުމުގެ ދަށަށް އޭނާ ގެންދިޔަ ފަހުން ކަމަށެވެ.
"އަޅުގަނޑު ނޯންނާނެ ޤަސްތުގައި މީހަކު މަރާފައެއް. ޤާސިމްގެ މަރަކީ އަޅުގަނޑަށް އެނިގެން ވީ ކަމެއް ނޫން. އެއީ އަޅުގަނޑު ދެނަހުރި ކަމެއްވެސް ނޫން." މިއަދުގެ ޝަރީޢަތުގައި އަދުހަމް ބުނެފައިވެއެވެ.
މިއަދުގެ ޝަރީއަތުގައި ވާހަކަ ދައްކަމުން އަދުހަމްގެ ދިފާއީ ވަކީލު ވިދާޅުވެފައިވަނީ، އަދުހަމް ދައުވާއަށް އިންކާރުކުރާކަން ވަކީލުއާއި ހިއްސާކޮށްފައި ނުވާ ކަމަށާއި، އެހެންކަމުން މައްސަލަ ދިރާސާކުރަން އިތުރު ވަގުތު ބޭނުންވާނެ ކަމަށެވެ.
