ރޭ ފަތިހު ގއ. އަތޮޅު ހޮސްޕިޓަލަށް ގެނައި ޒުވާނަކު މަރުވެފައިވާ، މައްސަލާގައި 6 މީހަކު ހައްޔަރުކޮށްފައިވާކަމަށް ފުލުހުން ވިދާޅުވެއްޖެއެވެ.
ފުލުހުން މިއަދު ހެނދުނު ވިދާޅުވެފައިވަނީ ގއ. އަތޮޅު ހޮސްޕިޓަލަށް މިއަދު ފަތިހު 05:00 އެހާކަންހާއިރު ގެންދިޔަ 24 އަހަރުގެ ދިވެހި ފިރިހެނަކު، ހޮސްޕިޓަލަށް ގެންދިޔަ އިރުވެސް ނިޔާވެފައިވާ މައްސަލައެއް މިއަދު 05:09 ގައި ފުލުހުންނަށް ހުށައަޅާފައިވާކަމަށެވެ.
މިއަދު ހެނދުނު 09:37 ގައި ފުލުހުން ވިދާލުވެފައި ވަނީ މި މައްސަލައާއި ގުޅުން ހުރި ކަމަށް ބެލެވޭ މީހުން ހައްޔަރު ކުރުމުގެ މަސައްކަތް ކުރަމުންދާކަމަށެވެ.
އެގޮތުން މިއަދު މެންދުރު ފަހު 14:36 ހާއިރު ފުލުހުން ވިދާޅުވީ މި މައްސަލައާއި ގުޅުން ހުރި ކަމަށް ތުހުމަތު ކުރެވޭ 6 މީހުން ކޯޓު އަމުރެއްގެ ދަށުން މިއަދު ހައްޔަރުކޮށްފައިވާކަމަށެވެ.
މި މައްސަލާގައި ހައްޔަރު ކޮށްފައިވަނީ 24 އަހަރުގެ ދެ މީހަކާއި، 18 އަހަރުގެ މީހަކާއި، 23 އަހަރުގެ މީހަކާއި، 21 އަހަރުގެ މީހަކާއި، 20 އަހަރުގެ މީހެއްކަމަށެވެ. މި އެންމެންނަކީވެސް ދިވެހިންކަމަށް ފުލުހުން ވަނީ ވިދާޅުވެފައެވެ.
