މި ދިޔަ ބުރާސްފަތި ދުވަހުގެ ރޭ ފަތިހު ގއ. އަތޮޅު ހޮސްޕިޓަލަށް ގެނައި ޒުވާނަކު މަރުވެފައިވާ، މައްސަލާގައި ހައްޔަރު ކުރި މީހުންގެ ތެރެއިން އެކަކު ޝަރީއަތް ނިމެންދެން ބަންދުގައި ބެހެއްޓުމަށް އަމުރު ކޮށްފިއެވެ.
މި މައްސަލާގައި ފުލުހުން ވަނީ ކޯޓުއަމުރެއްގެ ދަށުން 6 މީހަކު އެ ދުވަހު ހައްޔަރު ކޮށްފައެވެ. މި މައްސަލާގައި ހައްޔަރު ކޮށްފައިވަނީ 24 އަހަރުގެ ދެ މީހަކާއި، 18 އަހަރުގެ މީހަކާއި، 23 އަހަރުގެ މީހަކާއި، 21 އަހަރުގެ މީހަކާއި، 20 އަހަރުގެ މީހެއްކަމަށެވެ. މި އެންމެންނަކީވެސް ދިވެހިންކަމަށް ފުލުހުން ވަނީ ވިދާޅުވެފައެވެ.
ފުލުހުން މިއަދު ވިދާޅުވީ މި މައްސަލައިގައި ހއްޔަރު ކުރި މީހުންގެ ތެރެއިން 23 އަހަރުގެ މީހާ ޝަރީއަތް ނިމެންދެން ބަންދުގައި ބެހެއްޓުމަށް އަމުރު ކޮށްފައިވާކަމަށެވެ. މީގެ އިތުރުން 24 އަހަރުގެ ދެ މީހުންނާއި 20 އަހަރުގެ މީހާއަށް 12 ދުވަސް ދީފައިވާއިރު، 21 އަހަރުގެ މީހާއަށް ދީފައި ވަނީ 10 ދުވަހެވެ. އަދި 18 އަހަރުގެ މީހާއަށް ވަނީ 5 ދުވަސް ދީފައެވެ.
ފުލުހުން ވިދާޅުވެފައިވަނީ، ގއ. އަތޮޅު ހޮސްޕިޓަލަށް ބުރާސްފަތި ދުވަހުގެ ރޭ ފަތިހު 05:00 އެހާކަންހާއިރު ގެންދިޔަ 24 އަހަރުގެ ދިވެހި ފިރިހެނަކު، ހޮސްޕިޓަލަށް ގެންދިޔަ އިރުވެސް ނިޔާވެފައިވާ ކަމަށާއި މައްސަލަ އެރޭ ފަތިހު 05:09 ގައި ފުލުހުންނަށް ހުށައަޅާފައިވާކަމަށެވެ.
