މެލޭޝިއާއިން ދިވެއްސަކު ކޮވިޑް-19އަށް ޕޮޒިޓިވް ވެއްޖެއެވެ.
މެލޭސިއާގެ ރިޕޯރޓްތައް ބުނާގޮތުން ކޮވިޑް-19 މިއަދު ޕޮޒިޓިވްވިކަމަށް އާއްމު ކުރި 26 ގައުމެއްގެ މީހުންގެ ތެރޭގައި ދިވެއްސަކު ހިމެނެއެވެ.
މިކަމާއި ގުޅިގެން މެލޭޝިއާގައި ހުންނަ ރާއްޖޭ އެމްބަސީއިން ވިދާޅުވީ، މެލޭސިއާގައި މެލޭސިއާ ރައްޔިތުން ނޫން އެހެން ޤައުމުތަކުގެ ރައްޔިތުންގެ ކޮވިޑް-19 އަށް ޕޮޒިޓިވްވެފައިވާ 416 މީހުންގެ ތެރޭގައި ދިވެއްސަކު ހިމެނޭކަމަށް އެޤައުމުގެ ހެލްތު މިނިސްޓްރީއިން އިޢުލާންކުރުމާއި ގުޅިގެން އެކަން ޔަޤީން ކުރުމުގެ މަސައްކަތް ކުރަމުންދާކަމަށެވެ.
މިކަމާއި ގުޅިގެން ދިވެހި ސަރުކާރުގެ ބަހެއް އަދި ނުލިބެއެވެ.
ރާއްޖެއިން މިހާތަނަށް 19 މީހަކު ވަނީ ކޮވިޑް-19 އަށް ޕޮޒިޓިވްވެފައިވާއިރު، އޭގެތެރެއިން 13 މީހަކު މިހާރުވަނީ ރަނގަޅުވެފައެވެ. އަދި މިހާރު ރާއްޖޭގައި ފަރުވާ ދެމުން އަންނަނީ އިނގިރޭސިވިލާތުން އައި 4 ދިވެއްސަކަށެވެ. ބާކީ ތިބި ދެ މީހުން އެ ބައްޔަށް ޕޮޒިޓިވްވިކަން އެނގުނީ ރާއްޖެއިން ފުރައިގެން ދިޔަ ފަހުންނެވެ.ރާއްޖެއިން ބޭރުގައި ހަތަރު ދިވެއްސަކު މިހާރުވެސް ކޮވިޑް-19 އަށް ޕޮޒިޓިވްވެފައިވާކަން ފާހަގަކޮށްލެވެއެވެ.
ކޮވިޑް-19 އިން ރައްކާތެރިވުމުގެ ގޮތުން ސަރުކާރުން ގިނަ ފިޔަވަޅުތަކެއް އަޅަމުންދާއިރު، މިހާތަނަށް 30 އަށް ވުރެ ގިނަ ނިންމުންތައް ނިންމާފައިވާކަން ފާހަގަކޮށްލެވެއެވެ.
