އިންޑިއާގެ ޓްރިވެންޑްރަމްގައި ދިރިއުޅޭ ދިވެހިންގެ ތެރެއިން އަނބުރާ ރާއްޖެ އަންނަން ބޭނުންވާ މީހުން ގެނައުމަށް ބާއްވާ ހާއްސަ ފްލައިޓް މިއަދު 205 ދިވެހިން ރާއްޖެ ގެނެސްފިއެވެ.
މިއަދުގެ މެންދުރުގެ ވަގުތެއްގައި މޯލްޑިވިއަނުން އެކަން ހާމަކޮށްފައިވާއިރު، މޯލްޑިވިއަނުން ވިދާޅުވީ، ޓްރިވެންޑްރަމްގައި ތިބި ދިވެހިން ރާއްޖެ ގެނައީ ދެ ފްލައިޓެއްގައިކަމަށެވެ. އެގޮތުން ފުރަތަމަ ފްލައިޓުގައި 50 މީހުން ގެނައި އިރު، ބާކީ ތިބި މީހުން ގެނައީ އެހެން ފްލައިޓެއްގައި ކަމަށް ވެސް މޯލްޑިވިއަނުން ވިދާޅުވިއެވެ.
މިފްލައިޓުގައި ރާއްޖެ އަންނާނީ މިދިޔަ މަހުގެ 21 ގައި މޯލްޑިއަންގެ ފްލައިޓް ކެންސަލުވުމުން އިންޑިއާގައި ތާށިވެފައިވާ ދިވެހިންނާއި އާސަންދައިގެ ދަށުން ބޭސް ފަރުވާއަށް ގޮސް ތިބި ދިވެހިން ކަމަށް މިދިޔަ އަންގާރަ ދުވަހު ބޭއްވި ނޫސްވެރިންގެ ބައްދަކުވުމުގައި މޯލްޑިވިއަންގެ ޕީއާރު މެނޭޖަރު މޫސާ ވަސީމްވަނީ ވިދާޅުވެފައެވެ.
މީގެއިތުރުން އިންޑިއާގެ ކޮޗިންގައި ތިބި 200 ދިވެހިންވެސް ރާއްޖެ ގެނެސްފައިވާއިރު، މެލޭޝިއާގައި ތިބި 200 ދިވެއްސަކާއި ލަންކާގައި ނާދެވިފައި ތިބި 100 ދިވެއްސަކުވެސް މޯލްޑިވިއަނުން ރާއްޖެ ގެނެސްފައިވާކަން ފާހަގަކޮށްލެވެއެވެ.
މިހުރިހާ އެންމެން ވެސް ހެލްތު ޕްރޮޓެކްޝަން އެޖެންސީ (އެޗްޕީއޭ) ގެ އުސޫލުތަކާއި އެއްގޮތަށް 14 ދުވަހުގެ ކަރަންޓީނަކަށް ގެންދާނެއެވެ. އަދި ކަރަންޓީނު ފެސިލިޓީތަކުގައި ބެއިތިއްބުމަށް ފަހު ކޮވިޑް-19 އިގެ އެއްވެސް އަލާމާތެއް ފެނި ޕޮޒިޓިވްވެފައި ނުވާ ނަމަ އެމީހަކު ގެއަށް ދޫކޮށްލާނެއެވެ.
