އެންދަމަން ފީނަނިކޮށް ގެއްލުނު މަސްވެރިޔާ ނިޔާވެފައި އޮއްވާ ފެނިއްޖެއެވެ.

އެންދަމަން ފީނިގޮތަށް ގެއްލުނު މަސްވެރިޔާ ނިޔާވެފައިވާކަން ވަނީ މިނޫހަށް ކަށަވަރު ކުރެވިފައެވެ.

ނިޔާވެފައިވަނީ އެންހިފަން ފުޅި އަޅައިގެން ފީނަން ފޭބިފަހުން ޚަބަރެއް ނުވެގެން އެމްއެންޑީއެފް ހޯދުމުގެ މަސައްކަތް ކުރަމުންދިޔަ މަސްވެރިޔާއެވެ.

ނިޔާވެފައިވާ މަސްވެރިއަކީ އަސްދާން ނަމަކަށްކިޔާ ދޯނިން ފުޅި އަޅައިގެން އެންހިފަން ފޭބި އުމުރުން 27 އަަހަރުގެ ދިވެއްސެކެވެ.

އޭނާ ނިޔާވެފައި އޮއްވާ ފެނިފައިވަނީ އޭނާ ހޯދުމުގެ މަސައްކަތް ކުރަމުންދަނިކޮށް ކޯސްޓްގާޑްގެ ޑައިވަރުންގެ ޓީމަށެވެ. ކޯސްޓްގާޑްގެ ޓީމާއެކު އެ ދޯނީގެ ޑައިވަރުންވެސް އޭނާ ހޯދުމުގެ މަސައްކަތުގައި ބައިވެރިވެފައިވެއެވެ.

އެމްއެންޑީއެފް އިން އިތުރަށް ވިދާޅުވީ، ނިޔާވެފައިވާ މަސްވެރިޔާ ނަގާފައިވަނީ 50 މީޓަރު އަޑިން މިރޭ 23:30 ހާއިރު ކަމަށާއި، އޭނާގެ ހަށިގަނޑު މިހާރު ތިނަދޫއަށް ގެންގޮސްފައިވާ ކަމަށެވެ.