އިޒްރޭލު ޔަހޫދީ ސިފައިންގެ ލަޝްކަރުތައް ގައްޒާ ބޯޑަރު ކައިރިއަށް ޖަމާކޮށް އެއްގަމު މަގުން ގައްޒާއަށް އެރުމުގެ ތައްޔާރީތީ އިޒްރޭލުން ވާން ފަށައިފިއެވެ.
އިޒްރޭލުގެ ބޮޑުވަޒީރު ނަތަންޔާހޫ ބުނެފައިވަނީ، ޓޭންކުތަކާއި، އާރޓިލަރީ ތަކާއި އަދި މިނޫންވެސް އެއްގަމު މަގުން ގައްޒާއަށް އަރަން ބޭނުންވާނެ ހަނގުރާމައިގެ ވަސީލަތްތައް ތައްޔާރީގައި ބޭއްވުމަށް އިޒްރާއިލްގެ ސިފައިންނަށް އަންގައިފައި ވާކަމަށެވެ.
ގައްޒާއަށް މީގެ ދެދުވަސްކުރިން އިޒްރާއިލުން ދޭންފެށި ހަމަލާތަކުގައި މިހާތަނަށްވަނީ ފަލަސްތީނުގެ 24 މީހަކު ޝަހީދުކޮށްލާފައެވެ. ޝަހީދުވި މީހުންގެ ތެރޭގައި މާބަނޑު ދެއަންހެނުންނާއި ތިންކުޑަކުދިންވެސް ހިމެނެއެވެ.
އިޒްރޭލުން ދޭންފެށި ހަމަލާތަކުގެ ރައްދުގައި ގައްޒާގައި ހަރަކާތްތެރިވާ ހަނގުރާމަވެރި ޖަމާއަތްތަކުން ދިން ހަމަލާތަކުގައި މިހާތަނަށްވަނީ އިޒްރޭލުގެ ހަތަރު މީހަކު މަރާލައިފައެވެ.
ގައްޒާއަކީ އިޒްރޭލު ސިފައިން ހިޞޯރުކޮށްފައިވާ ފަލަސްތީނުގެ ސިޓީއެކެވެ. އިޒްރޭލުގެ ހިޞޯރާއި ގުޅިގެން ގައްޒާއަށް ބޭނުންވާ ޒަރޫރީ ތަކެތިވެސް އެތެރެކުރަންޖެހެނީ ބިންގަރާސްތައް މެދުވެރިކޮށް ސިއްރިއްޔާތުގައެވެ.
ގާޒާގައި ހަމަލާތައް ދޭން ފަށާފައި މިވަނީ އެ ސިޓީ ބަންދުކޮށްފައިވާ ބޭއްވުމާ ދެކޮޅަށް ހުކުރު ދުވަހު ކުރި އިހްތިޖާޖެއްގެ ތެރޭންނެވެ. އިޒްރޭލުން ބުނެފައި ވަނީ ގާޒާ ބަންދުކޮށްފައި ބާއްވަނީ ހަނގުރާމަވެރި ޖަމާއަތްތަކަށް ހަތިޔާރު ފޯރުވުން ހުއްޓުވުމަށްޓަކައި ކަމަށެވެ.
