ލައިލަތުލްޤަދްރި އަކީ ރޭތަކުގެ ތެރެއިން އެންމެ މާތް ރެ އެވެ. އެެއީ ކީރިތި ޤުރުއާން ބާވާލެއްވި ރެޔެވެ. އަދި އެ ރެއަކީ އެ ރޭގައި ކުރާ އަޅުކަން އެއް ހާސް މައްސަރުގެ އަޅުކަމަށް ވުރެ ހެޔޮކަން ބޮޑުވެގެންވާ ރެޔެވެ. އެ ރެއަކީ ކޮން ރެއެއްކަން ކަނޑައެޅިގެން ނޭނގުނު ނަމަވެސް ރަމަޟާން މަހުގެ ފަހު ދިހައިގައި ނުވަތަ ފަހު ދިހައިގެ އޮނަހިރި ރޭތަކުގައި އެ ރޭ ހޯދުމަށް މަސައްކަތް ކުރުމަށް މާތް ނަބިއްޔާ އިރުޝާދު ދެއްވާފައިވެއެވެ.
މިރެޔާ ބެހޭގޮތުން މާތް ﷲ ކީރިތި ޤުރުއާނުގައި ވަހީ ކުރައްވަނީ:
إِنَّا أَنزَلْنَاهُ فِي لَيْلَةِ الْقَدْرِ * وَمَا أَدْرَاكَ مَا لَيْلَةُ الْقَدْرِ * لَيْلَةُ الْقَدْرِ خَيْرٌ مِّنْ أَلْفِ شَهْرٍ * تَنَزَّلُ الْمَلائِكَةُ وَالرُّوحُ فِيهَا بِإِذْنِ رَبِّهِم مِّن كُلِّ أَمْرٍ * سَلامٌ هِيَ حَتَّى مَطْلَعِ الْفَجْرِ (القدر97)
"ހަމަކަށަވަރުން، ތިމަންރަސްކަލާނގެ އެ قرآن ބާވައިލެއްވީ ލައިލަތުލް ޤަދްރި ވިލޭރޭގައެވެ. އަދި ލައިލަތުލް ޤަދްރި ވިލޭރެއަކީ، ކޮންރެޔެއްކަން ކަލޭގެފާނަށް އަންގައިދިނީ ކޮންއެއްޗެއްތޯއެވެ؟ ލައިލަތުލް ޤަދްރި ވިލޭރޭ، އެއްހާސް މައްސަރަށްވުރެ ހެޔޮކަން ބޮޑެވެ. މަލާއިކަތުންނާއި، ޖިބްރީލްގެފާނު އެބޭކަލުންގެ ވެރިރަސްކަލާނގެ އިޒުނަފުޅާއެކު، ހުރިހާ އަމުރުފުޅަކާއިގެން އެރޭ ފައިބައިވަޑައިގަންނަވާނެތެވެ. އެއީ ފަޖުރުގެ އަލިކަން ފާޅުވެއްޖައުމަށް ދާންދެން، أمانކަމާއި، ސަލާމަތްކަން ލިބިގެންވާ ރެޔެކެވެ"
ޤުރުއާނުގައި އެއް ސޫރަތް އެއްކޮށް މިރެއަށް ޙާއްސަ ކުރުމުންވެސް އެރޭގެ މާތްކަން އެނގިގެން އެބަދެއެވެ. މީގެ އިތުރުން ޖިބްރީލްގެފާނާއި މަލާއިކަތްބޭކަލުން ރަޙްމަތާއި ބަރަކާތާއިގެން އެރޭ ފައިބައިވަޑައިގަންނަވާނެކަން ސާފުކޮށް ޤުރުއާނުގައި އެވަނީ ބަޔާންކޮށްދެއްވާފައެވެ. މިރެޔަކީ ސަލާމަތްކަން ލިބިގެންވާރެއެކެވެ.
ކުރިއަށް އޮންނަ އަހަރުގެ ހުރިހާ ކަމެއް ﷲ ސުބުޙާނަހޫ ވަތަޢާލާ އެރޭ މިންވަރުކުރައްވައި ކަނޑައަޅުއްވާ ކަމަށް ކީރިތި ޤުރުއާނުގައި ބަޔާންވެގެންވެއެވެ. އަދި މިއުއްމަތުގެ މާތް ނަބިއްޔާ، ރަމަޟާން މަހުގެ ފަހު ދިހައިގައި، އެހެން ރޭތަކާއި ދުވަސްތަކަށްވުރެ ބޮޑަށް އަޅުކަމާއިގެން އަވަދިނެތި އުޅުއްވިއެވެ.
އެހެންކަމުން މި މާތްރޭގެ ޘަވާބާއި ދަރުމައޭގެ އެންމެ ފުރިހަމަ ގޮތުގައި ލިބިގަތުމަށްޓަކައި ރަމަޟާންމަހުގެ ފަހު ދިހައިގެ ރޭތަށް ރޭއަޅުކަން ކުރުމާއި ޤުރުއާން ކިޔެވުމުގައި ހޭދަކުރަންޖެހެއެވެ. އަދި ގިނަ ގިނައިން ދުޢާކުރުމާއި އިސްތިޤްފާރުކުރުމުގައި ދެމި ހުންނަންޖެހެއެވެ. އެއްހާސް މައްސަރުގެ ޘަވާބާއި ދަރުމަލިބޭ މިރެޔާ އެކު އެހެން އެއްވެސް އުންމަތަކަށް ދެއްވާފައިނުވާ ޝަރަފެއް މާތް ﷲ މިއުންމަތަށްމިވަނީ ދެއްވާފައެވެ.
