މާފުށީ ޖަލުގައި ހުކުމް ތަންފީޒު ކުރަމުންދިޔަ ގ. ކީމާ އަބްދުﷲ ރަޝީދު މުހައްމަދު ނިޔާވި ވާހަކަ ދައްކަވަމުން ފޮނަދޫ ދާއިރާގެ މެންބަރު މޫސާ ސިރާޖު މަޖިލިސްގައި ކީރިތި ކުރައްވައިފި އެވެ.
ސިރާޖު ވަނީ އަބްދުﷲ ރަޝީދުގެ ވާހަކަ ދައްކަވަން ފައްޓަވައި، ކުރި އަސަރުން ކީރިތި ކުރެއްވެން ފެށުމުން ވާހަކަ އިތުރަށް ކުރިޔަށް ނުގެންދެވިގެން ހުއްޓާލައިފައެވެ.
"ފުލުހެއް ގައިގަ ޖަހައިގެން އަބްދުﷲ ރަޝީދު ޖަލުގައި އޮންނަން ޖެހުނިއްޔާ، އަޅާނުލައިގެން ޖަލުގައި އަބްދުﷲ ރަޝީދު މަރާލީމާ، އެކަމުގައި ޒިންމާ ނަގަންޖެހޭ މީހުން ޖަލަށް ނުލެވެންޏާ އަޅުގަނޑުމެން ކޮންކަމެއްތޯ މިކުރަނީ. އަޅުގަނޑުމެން ކޮން ވާހަކައެއްތޯ މި ދައްކަނީ" ސިރާޖު ވިދާޅުވިއެވެ.
އަބްދުﷲ ރަޝީދުގެ ވާހަކަ ދެއްކުމަކީ ވަރަށް އަޝަރު ކުރާ ކަމެއް ކަމަށް ވިދާޅުވެ ސިރާޖަށްވަނީ ކީރިތި ކުރައްވަން ފެއްޓިފައެވެ. ސިރާޖު ވިދާޅުވީ އަބްދުﷲ ރަޝީދުގެ ވަކީލެއްގެ ގޮތުގައި ހަރަކާތްތެރިވެފައި ވާނެ ކަމަށެވެ. މިއާއިއެކު ސިރާޖު ވަނީ ވަހާކަ ކުރިޔަށް ނުގެންދެވިގެން ހުއްޓާލައިފައެވެ.
ސިރާޖު ވިދާޅުވީ އަބްދުﷲ ރަޝީދު ޖަލުގައި އަނިޔާވެރިކޮށް އަޅާނުލާ ބޭއްވުމުގެ ސަބަބުން މިދުނިޔެ އާއި ވަކިވެގެން ދާންޖެހުނީ ވަރަށް ގިނަ ފަރާތްތަކެއްގެ އިޙުމާލުން ކަމަށެވެ. ސިރާޖު ވިދާޅުވީ ބައެއްގެ އިޙުމާލުން އަބްދުﷲ ރަޝީދު ދުނިޔެއާއި ވަކިވެގެން ދިޔުމުން އެކަމުގެ އަދަބު ލިބޭ ފަރާތެއް ނެތް ކަމަށާއި އަދަބަކަށް މިދެނީ މަގާމުން ވަކިކުރުން ނުވަތަ މުސާރަ ކަނޑާލުން ކަމަށެވެ. ނަމަވެސް އެއީކީ އެންމެ އިންސާފުވެރި ގޮތަ ކަމަކަށް ގަބޫލު ނުކުރެވޭ ކަމަށްވެސް ސިރާޖު ވިދާޅުވުއެވެ.
ސިރާޖު ވިދާޅުވީ އަބްދުﷲ ރަޝީދު ފުލުހެއް ގައިގަ ޖަހައިގެން ބަންދުގައި އޮންނަން ޖެހުނުއްޔާ، އަބްދުﷲ ރަޝީދަށް އަޅާނުލާ، ބޭސްފަރުވާ ނުކޮށް މިދުނިޔެއާއި ވަކިވާންޖެހުމުގެ ޒިންމާ ކޮންމެސް ބަޔަކު މިކަމުގެ ޒިންމާ އުފުލަން ޖެހޭނެ ކަމަށެވެ. ފުލުހެއް ގައިގާ ޖެހީމައި ލިބޭ އަނިޔާއަށްވުރެ މީހަކު ދުނިޔެއިން ވަކިވުމުން ލިބޭ ގެއްލުން މާ ބޮޑު ކަމަށެވެ. މި ހުރިހާ މުއައްސަސާތަކުގެ މީހުން ވަކިކުރުމުގެ އިތުރުން އެންމެންގެ މައްޗަށް ޖިނާޢީ ތަޙްޤީޤެއް ހިންގާ އެމީހަކު ޒިންމާވާވަރުގެ މިންވަރަށް ޖަލުގެ ހުކުމް އަންނަން ޖެހޭނެ ކަމަށް ސިރާޖު ވިދާޅުވިއެވެ.
2015 ވަނަ އަހަރުގެ މެއި 1 ވަނަ ދުވަހު މާލޭގައި ބޭއްވި މޭޑޭ މުޒާހަރާއާ ގުޅިގެން ކުށް ސާބިތުވެ ޖަލުގައި ހުކުމް ތަންފީޒު ކުރަމުންދިޔަ އަބްދުﷲ ރަޝީދު މުހައްމަދު ނިޔާވެފައިވަނީ 2017 އޮކްޓޯބަރ މަހުގެ 10 ވަނަ ދުވަހު އައޖީއެމްއެޗްގައި ފަރުވާދެމުން ދަނިކޮށެވެ.
