ރޭ ދަންވަރު ބޭއްވި ރައްޔިތުންގެ މަޖިލީހުގެ ޖަލްސާގައި ހަމަނުޖެހުން ހިނުގުމުން ދެން ކަންހިނގާފައިވަނީ މަޖިލީހުގެ ޤަވާއިދާއި ހިލާފަށްކަމަށް ތިމަރަފުށީ ދާއިރާގެ މެންބަރު އަބްދުﷲ ރިޔާޒު ވިދާޅުވެއްޖެ އެވެ.
ރިޔާޒު ކުރެއްވި ޓްވީޓެއްގައި ވިދާޅުވެފައިވަނީ މަޖިލިހުގެ ޖަލްސާއެއް ހިގަމުންދާއިރު މަޖިލިހުގެ ރައީސްގެ އަމުރަށް މެމްބަރަކު ކިޔަމަން ނުވެއްޖެނަމަ ރިޔާސަތުން އަދި މެމްބަރުން ޢަމަލްކުރަން ޖެހޭނެގޮތް މަޖލިހުގެ ޤަވާއިދުގެ 65 ވަނަ މާއްދާގައި ތަފްސީލްކޮށް ބަޔާންކޮށްފަވާ ކަމަށެވެ.
ރިޔާޒު ވިދާލުވީ ނަމަވެސް ރޭގައި އެކަން ހިނގާ ގޮސްފައިވަނީ މަޖިލީހުގެ ޤަވާއިދާ ޚިލާފަށް ކަމަށެވެ.
މަޖިލިހުގެ ޖަލްސާއެއް ހިގަމުންދާއިރު މަޖިލިހުގެ ރައީސްގެ އަމުރަށް މެމްބަރަކު ކިޔަމަން ނުވެއްޖެނަމަ ރިޔާސަތުން އަދި މެމްބަރުން ޢަމަލްކުރަންޖެހޭނެގޮތް މަޖލިހުގެ ޤަވާއިދުގެ 65 ވަނަ މާއްދާގައި ތަފްސީލްކޮށް ބަޔާންކޮށްފަވޭ. ރޭގަކަންހިގާގޮސްފަވަނީ ޤަވާއިދާޚިލާފަށް. https://t.co/476EKZnf5o pic.twitter.com/zZGJXSOV0v
— Abdulla Riyaz MP (@riyazabdulla) June 2, 2020
މަޖިލީހުގެ ގަވާޢިދު ބުނާގޮތުން ރައްޔިތުންގެ މަޖިލީހުގެ ރައީސްގެ އަމުރަށް ނުކިޔަމަންތެރި ވެއްޖެނަމަ 2 ފަހަރު ނަސޭހަތްތެރި ވުމަށްފަހު އެ މެންބަރެއްގެ ނަން އިއްވައި ބޭރަށް ނެރުމަށް އެންގުމުގެ ބާރު މަޖިލީހުގެ ރިޔާސަތަށް ލިބިގެންވެއެވެ. އަދި މިގޮތަށް މެންބަރުގެ ނަން އިއްވުމުން އެ މެންބަރުކު މަޖިލިސް ދޫކޮށް ނިކުންނަވަން ޖެހޭނެއެވެ. އަދި އިތުރަށް ދެން އެޖަލްސާގައި އެމެންބަރަކަށް ބައިވެރިވެ ނުލެއްވޭނެ އެވެ.
ރޭގައި މަޖިލީހުގެ ރިޔާސަތުން ވަނީ މަޖިލިސް ފެށުމާއިއެކު ނައިފަރު ދާއިރާގެ މެންބަރު އަޙްމަދު ސިޔާމްގެ ނަން އިއްވާފައެވެ. މަޖިލިސް ފެށުމާއިއެކު ސިޔާމް ވަނީ ޤާނޫނު އަސާސީ އިސްލާޙްކުރުމަށް ޖަލްސާ ބާއްވަމުންދަނީ ޤާނޫނު އަސާސީ އާއި ހިލާފަށްކަމަށް ވިދާޅުވެ އަޑު ގަދަ ކުރައްވަން ފައްޓަވާފައެވެ.
މިއާއިއެކު މަޖިލިސްތެރެވަނީ ހަލަބޮލިވެ ހަމަނުޖެހުންތަކެއް ހިނގާފައެެވެ.
