ކޮވިޑް-19 ޖެހިގެން 50،000 ވުރެ ގިނަ މީހުން މަރުވި ދެވަނަ ގައުމަކަށް ބުރެޒިލް ވެއްޖެއެވެ.
އެމެރިކާގެ ފަހަތުން ބުރެޒިލް މި މަގާމު ހޯދައިފައިވާއިރު ކޮވިޑް-19ގެ ނުރައްކާ މިވަގުތު އެންމެ ހަލުވިކަމާއެކު ފެތުރެމުންދާ އެއް ގައުމަކީވެސް ބުރެޒިލެވެ.
ކޮވިޑް-19ގެ ހާލަތު ބުރެޒިލުގައި ކޮންޓުރޯލުން ނައްޓައި މިހާރު އެގައުމުގައި މިބައްޔަށް ޕޮޒިޓިވުވު ފަރާތްތަކުގެ އަދަދު މިލިއަނަކަށްވުރެ މައްޗަށް އަރައިފައިވާއިރު މިކަމުގެ ސަބަބުން އެގައުމުގެ ސިޔާސީ މަޝްރަހުވެސްވަނީ ވަރަށް ބޮޑަށް ގޯސްވެގެން ގޮސްފައެވެ. މިހާތަނަށް ބުރެޒިލްގެ ދެ ހެލްތް މިނިސްޓަރުންވަނީ އިސްތިއުފާ ދީފައެވެ.
ކޮވިޑް-19ގެ ހާލަތު ބުރެޒިލްގައި އިންތިހާއަށް ގޯސްވެގެން ދިއަނަމަވެސް ބުރެޒިލްގެ ރައީސް ވަކާލާތު ކުރައްވަމުން ގެންދަވަނީ ފުރަބަންދު އުވާލައި އިގުތިސާދީ މަސައްކަތްތަކަށް ގައުމު ހުޅުވާލުމަށެވެ. މިމައްސަލައިގެ ބަހުސްތަކެއް ބުރެޒިލްގައި ފެށިފައިވާއިރު ސިއްހީ މާހިރުން އަންނަނީ ރައީސްގެ ވާހަކަފުޅަށް ވަރަށް ބޮޑަށް ފާޑުވިދާޅުވަމުންނެވެ.
ބުރެޒިލްގެ ހެލްތް މިނިސްޓްރީން އިއްޔެ ހާމަކޮށްފައިވާ މައުލޫމާތުތަކަށް ބަލާއިރު، އިއްޔެ އެކަނިވެސް ބުރެޒިލުންވަނީ މިބަލީގައި641 މަރުވެފައެވެ. އަދި އަލަށް މިބައްޔަށް 17،000 ވުރެ ގިނަމީހުންވަނީ ޕޮޒިޓިވުވެފައެވެ.
