ކޮވިޑް-19ގެ ޝިކާރައަކަށްވި މީހުންގެ ތެރެއިން ތިން މީހެއްގެ ހާލު ބޮޑުވެ، އެ ތިން މީހުން ހާލުބޮޑު ތިން މީހުން ދަރުމަންތަ ހޮސްޕިޓަލަށް ބަދަލުކޮށްފިއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ވިދާޅުވީ، ޓްރީ ޓޮޕް ހޮސްޕިޓަލްގައި ފަރުވާދެމުންދިޔަ ތިން މީހެއްގެ ހާލު ގޯސްވެ، ދަރުމަންތަ ހޮސްޕިޓަލްގެ 11 ވަނަ ފަންގިފިލާގައި ގާއިމްކޮށްފައިވާ ކޮވިޑަށް ފަރުވާދޭ ސެންޓަރަށް ބަދަލުކޮށްފައިވާ ކަމަށެވެ.
ދަރުމަވަންތަ ހޮސްޕިޓަލްގައި ޤާއިމުކޮށްފައިވާ މިސެންޓަރަކީ ކޮވިޑް ބަލި ޖެހޭ މީހުންގެ ތެރެއިން ހާލު ސީރިއަސްވާ މީހުންނަށް ފަރުވާ ދިނުމަށް އެންމެ ފުރަތަމަ ގާއިމްކުރި ސެންޓަރެވެ. އަނެއްކޮޅުން ސަރުކާރުން މިހާރު މަސައްކަތްކުރަމުންދަނީ މި މަހުގެ 30 އަށް ޓްރީޓޮޕް ހޮސްޕިޓަލް އެއްކޮށް ހުސްކޮށް އެހޮސްޕިޓަލް އާންމު ހާލަތަކަށް ގެންދިއުމަށެވެ.
ޓްރީޓޮޕް ހޮސްޕިޓަލް މިއަންނަ ޖުލައި މަހު އަލުން ހުޅުވާލަން ނިންމާފައި ވަނީ ރައްކާތެރިކަމުގެ މިންގަނޑުތަކާއި އެއްގޮތަށް ޑީކޮންޓެމިނޭޓް ކުރުމަށްފަހުގައެވެ.
އަދި މިތިން މީހުންގެވެސް ހާލު ކްރިޓިކަލްކަމަށް އެޗްޕީއޭއިން ވިދާޅުވެފައިވާއިރު، އެތަނުން ދެމީހަކަށް ފަރުވާދެމުންދަނީ ވެންޓިލޭޓަރުގެ އެހީގައިކަމަށްވެސް ވިދާޅުވިއެވެ.
✳️ Three COVID-19 patients treated at Tree Top Hospital have been transferred to DH11. They are in critical condition, with two of them on ventilator support.
We will continue to monitor their situation closely
— Health Protection Agency (@HPA_MV) June 29, 2020
މިމީހުންނާއި ބެހޭ އިތުރު މަޢުލޫމާތެއް އެޗްޕީއޭއުން ހާމަކޮށްފައެއްނުވެއެވެ.
ރާއްޖެއިން މިހާތަނަށް 2،323 މީހަކު ކޮވިޑް-19 އަށް ޕޮޒިޓިވްވެފައިވާއިރު، 1،911 މީހަކުވަނީ މިހާރު މިބަލިން ރަނގަޅުވެފައެވެ. މިބަލީގައި ރާއްޖެއިން 8 މީހަކުވަނީ މަރުވެފައެވެ. އެއީ ހަތަރު ދިވެހިންނާއި ހަތަރު ބިދޭސީންނެވެ.
