ފާއިތުވެދިޔަ 24 ގަޑިއިރުގެ ތެރޭގައި ބުރެޒިލުން ކޮވިޑް-19 ޖެހިގެން މަރުވި 1،000 ވުރެ ގިނަ މީހުންނާއެކު އެގައުމުން މިބަލީގައި ޖުމްލަ މަރުވި މީހުންގެ އަދަދު 60،000 ވުރެ އިތުރުވެއްޖެއެވެ.
މިއާއެކު ބުރެޒިލުވެގެން ގޮސްފައިވަނީ އެމެރިކާއަށްފަހު މިބަލީގައި އެންމެ ބޮޑު ގެއްލުމެއް ލިބުނު ގައުމުގެ ގޮތުގައެވެ. ބުރެޒިލުން މިހާތަނަށް މިބައްޔަށް 1،476،884 މީހުންވަނީ ޕޮޒިޓިވުވެފައެވެ. އަދި ކޮންމެ ދުވަހަކު އެގައުމުން މިބައްޔަށް ޕޮޒިޓިވުވާ މީހުންގެ އެވްރެޖު އުޅެނީ 10،000 މަތީގައެވެ.
ކޮވިޑް-19ގެ ހާލަތު ބުރެޒިލުގައި ކޮންޓުރޯލުން ނައްޓައި މިހާރު އެގައުމުގައި މިބައްޔަށް ޕޮޒިޓިވުވު ފަރާތްތަކުގެ އަދަދު މިލިއަނަކަށްވުރެ މައްޗަށް އަރައިފައިވާއިރު މިކަމުގެ ސަބަބުން އެގައުމުގެ ސިޔާސީ މަޝްރަހުވެސްވަނީ ވަރަށް ބޮޑަށް ގޯސްވެގެން ގޮސްފައެވެ. މިހާތަނަށް ބުރެޒިލްގެ ދެ ހެލްތް މިނިސްޓަރަކު މަގާމުން ވަނީ ވަކިވެފައެވެ.
ކޮވިޑް-19ގެ ހާލަތު ބުރެޒިލްގައި އިންތިހާއަށް ގޯސްވެގެން ދިއަނަމަވެސް ބުރެޒިލްގެ ރައީސް ވަކާލާތު ކުރައްވަމުން ގެންދަވަނީ ފުރަބަންދު އުވާލައި އިގުތިސާދީ މަސައްކަތްތަކަށް ގައުމު ހުޅުވާލުމަށެވެ. މިމައްސަލައިގެ ބަހުސްތަކެއް ބުރެޒިލްގައި ފެށިފައިވާއިރު ސިއްހީ މާހިރުން އަންނަނީ ރައީސްގެ ވާހަކަފުޅަށް ވަރަށް ބޮޑަށް ފާޑުވިދާޅުވަމުންނެވެ.
އެމެރިކާ އަދި ބުރެޒިލް ފިޔަވައި އެހެން ގައުމެއްގައި މިބައްޔަށް ޕޮޒިޓިވުވީ މީހުންގެ އަދަދު މިލިއަނަކަށްވުރެ މަތިވެފައެއް ނުވެއެވެ. މި ދެގައުމާއި ޕޮޒިޓިވުވި މީހުންގެ އަދަދުގެ ގޮތުން އެންމެ ގާތްކުރާ ރަޝިއާގައިވެސް މުޅި ޖުމްލަ މިހާތަނަށް މިބައްޔަށް ޕޮޒިޓިވުވެފައިވަނީ 661,165 މީހުންނެވެ.
