ރައްޔިތުންގެ މަޖިލީހުގެ ގައުމީ ސަލާމަތާއި ހާރިޖީ ގުޅުންތަކުގެ ކޮމިޓީގެ ރޭގެ ބައްދަލުވުމުގައި އެޖެންޑާ ކުރި ބ. ބޮޑުފިނުޅުގައި ބިދޭސީން ހިންގި ހަމަނުޖެހުމުގެ މައްސަލައިގައި ކަމާ ގުޅުން ހުރި ފަސް އިދާރާ ކޮމިޓީއަށް ހާޒިރުކުރުމަށް ފާސްކޮށްފި އެވެ.
މި މައްސަލައާއި ގުޅިގެން ކޮމެޓީގެ ގިނަ މެނބަރުން އެއްއަބަސްވީ މި މައްސަލަ ބޮޑު މައްސަލައެއްގެ ގޮތުގައި ބެލުމަށެވެ. އިމިގްރޭޝަން ޑިޕާޓްމެންޓާއި، ފުލުހުން، އިކޮނޮމިކް މިނިސްޓްރީ، ހޯމް މިނިސްޓްރީ އަދި ލޭބަރ ރިލޭޝަން އޮތޯރިޓީ ކޮމިޓީއަށް ހާޒިރުކުރުމައް ނިންމާފައިވެއެވެ.
ވިލިމާލެ ދާއިރާގެ މެމްބަރު، އަހްމަދު އުޝާމް ކޮމިޓީގައި ވާހަކަ ދައްކަވަމުން ވިދާޅުވީ ބޮޑުފިނޮޅުގެ މައްސަލައަކީ ކޮމިޓީން ބަލަން ޖެހޭ މައްސަލައެއް ކަމަށާއި މިފަހުން ތިލަފުށީގައިވެސް ފަދަ މައްސަލައެއް ދިމާވިކަމަށެވެ. މި މައްސަލައިގައި ފެނިގެންދިޔައީ މައްސަލަޔާއި ގުޅުންހުރި ބިދޭސީންތައް ޑީޕޯޓުކޮށްލިތަން ކަމަށެވެ. އެހްންކަމުން މިފަދަ މައްސަލަތަކުގައި އަމަލުކުރާ ގޮތް ބަލަން ޖެހޭ ކަމައްވެސް ވިދާޅުވިއެވެ.
ބިދޭސީންނަށް މުސާރަނުދީ މަސައްކަތް ކުރާ ފަރާތްތަކާމެދު އެޅޭނީ ކޮން ފިޔަވަޅުތަކެއްތޯ ބަލައި މިކަމަށް ހައްލެއް ހޯދަން ޖެހޭ ކަމަށާއި ބޮޑުފިނޮޅުގެ މައްސަލައިގައި ވާހަކަ ދައްކާއިރު މުޅި މައްސަލައަށް ހައްލެއް ހޯދަން ޖެހޭކަމައް އުޝާމް ވިދާޅުވި އެވެ.
ވިލިފުށީ ދާއިރާގެ މެމްބަރު ހަސަން އަފީފު އުޝާމްގެ ވާހަކަތަކަށް ތާއީދު ކުރައްވަމުން ވިދާޅުވީ، ގަވައިދާ ހިލާފަށް މީހުން ގެނެސް އަދި ބިދޭސީން ލައްވާ މަސައްކަތް ކުރުވައި، މުސާރަނުދޭ މައްސަލައަށް އިސްކަންދޭންޖެހޭކަމަށެވެ.
ހަމައެޔާއެކު އަފީފު ވިދާޅުވީ ދައުލަތުން ބިދޭސީންގެ މުސާރަ ހޯދައި ދިނުމަށް ކުރާ މަަސައްކަތަކީ ކޮބާތޯ ބަލައި، އަދި މިކަންކަން ހައްލު ކުރުމަަށް ކުރާ މަސައްކަތަކީ، ނުވަތަ މިފަދަ ކަންކަން ކުރިއަށް އޮތްތާގައި ތަކުރާރުނުވުމަށް ކުރާ ކަންކަން ބަލައި ޕޮލިސީއަށް ގެންނަން ޖެހޭ ބަދަލަކީ ކޮބާތޯވެސް ބަލަންޖެހޭ ކަމަށެވެ. އަދި ބިދޭސީ މީހާއަށް މުސާރަ ނުލިބުމުން އޭނާއަށް އެކަންކަން ކަމާ ބެހޭ މުއައްސަސާތަކަށް ހުށަހެޅޭނެ ނިޒާމެއް އޮންނަންޖެހޭނެ ކަމަށާއި މިފަދަ ކަންކަމުގައި އޮތީ ކޮން އިންތިޒާމެއްތޯ ކޮމިޓީން ބަލަން ޖެހޭ ކަމަށް އޭނާ ވިދާޅުވި އެވެ.
ބިދޭސީންނަށް މުސާރަނުދީ މަސައްކަތް ކުރާ ފަރާތްތަކާމެދު އެޅޭނީ ކޮން ފިޔަވަޅުތަކެއްތޯ ބަލައި މިކަމަށް ހައްލެއް ހޯދަން ޖެހޭ ކަމަށާއި ބޮޑުފިނޮޅުގެ މައްސަލައިގައި ވާހަކަ ދައްކާއިރު މުޅި މައްސަލައަށް ހައްލެއް ހޯދަން ޖެހޭކަމައް އުޝާމް ވިދާޅުވި އެވެ
ގައުމީ ސަލާމަތާއި ހާރިޖީ ގުޅުންތަކުގެ ކޮމިޓީގެ މައްޗަންގޮޅި ދެކުނު ދާއިރާގެ މެންބަރު އަހްމަދު ހައިތަމް ވިދާޅުވި ބިދޭސީން މާލޭގައި ހަމަނުޖެހުން ހިންގައި މުޒާރާހާކުރުމަކީ ބިރުގަންނަންޖެހޭ ވަރުގެ ކަމެއް ކަމަށާއި މިފަދަ ކަންކަން ތަކުރާރު ވިޔަނުދިނުމައްޓަކައި ފިޔަވަޅުތައް އެޅުމައް މުއައްސަސާތަކުގައި އެދޭ ކަމަށެވެ. އަދި މިފަދަ ކަންކަން ހިންގާ ކަމުގައިވާނަމަ ޤައުމީ ނުރައްކަލަކަށްވެ ކަންބޮޑުވާ ހާލަތަކައް ދިޔުމުގެ ކުރިން ހައްލުކުރަން ޖެހޭ ކަމަށެވެ.
އިތުރައް ހައިތަމް ވާހަކަ ދައްކަވަމުން ވިދާޅުވީ ދިވެހިންގެ ގައުމުގައި ދިވެހިންނަށް އަނިޔާތަކެއް ލިބެމުންދާއިރު ނުތިބޭނެކަމަށެވެ. އެއީ ނުހައްގުން ވިޔަސް އަދި ހައްގުން ވިޔަސް އަޅުގަނޑުމެންގެ މީހުން ނުކުމެވެން އޮތިއްޔާ ނުކުންނާނެކަމަށެވެ. އަދި މިފަދަ ނުރައްކާތެރި ހާލަތަކަށް ރާއްޖެ ގޮސްދާނެތީ، މިކަން ހައްލުކުރުމަށް އެޅެން ހުރި ފިޔަވަޅުތައް އަޅަންޖެހޭކަމައް ވިދާޅުވިއެވެ.
ރައްޔިތުންގެ މަޖިލީހުގެ ގައުމީ ސަލާމަތާއި ހާރިޖީ ގުޅުންތަކުގެ ކޮމިޓީ މުގައްރިރު، މަރަދޫ ދާއިރާގެ މެމްބަރު އިބްރާޙިމް ޝަރީފު ވިދާޅުވީ، ފަސް ދުވަހުގެ ނޯޓިސްއެއް ދީ، އެ ފަރާތްތައް ކޮމިޓީއަށް ހާޒިރުކުރުމަށް ދައުވަތު ދޭނެ ކަމަށެވެ.
ބ އަތޮޅުގައި ރިސޯޓެއް ހަދަމުންދާ ބޮޑުފިނޮޅުގައި ބިދޭސީ މުވައްޒަފުންތަކެއް، ޖުލައިމަހުގެ 2 ވަނަ ދުވަހުވަނީ 12 ދިވެހިން ރަހީނުކޮށް ހަމަނުޖެހުންތަކެއް ހިންގާފައެވެ. ބޮޑުފިނޮޅުގައި ބިދޭސީން ހަޅުތާލުކޮށް ހަމަނުޖެހުން ހިންގައި ދިވެހިންތަކެއް ރަހީނުކޮށްފައިވަނީ އެ ބިދޭސީންނަށް މުސާރަ ނުދޭތާ ހަތް މަސްވެފައިވާތީ ކަމަށް ބުނެއެވެ. މި މައްސަލައާއި ގުލިގެން ރިސޯޓު ހެދުމުގެ މަސައްކަތާ ހަވާލުވެފައިވާ މިލަންދޫ ދާއިރާގެ މެމްބަރު އަލީ ރިޒާގެ އާރުއައިއެކްސް (ރިޒް) ކުންފުންޏާ ދެކޮޅަށް ކުރާ ހިއުމަން ޓްރެފިކިންގެ މައްސަލަތަކުގެ ތަޙުޤީޤަށް ރިޒާ ވަނީ ރޭ ފުލުސް އޮފީހަށް ހާޒިރުކޮށްފައިވެއެވެ.
