ރައްޔިތުން ޝަކުވާ ކުރަނީ އިންސާފު ލިބޭނީ ހަމައެކަނި މިވެރިކަމުގައިކަން ރައްޔިތުންނަށް އެނގޭތީ ކަމަށް ވައިކަރަދޫ ދާއިރާގެ މެންބަރު ހުސައިން ޒިޔާދު (ފިއްޓޭ) ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަފުޅު ދައްކަވަމުން ފިއްޓޭ ވިދާޅުވީ އެމްޑީޕީން އަބަދުވެސް ވަކާލާތު ކުރަމުން އައީ އިންސާފު މިގައުމުގައި ގާއިމް ކުރުމަށް ކަމަށެވެ.
ފިއްޓޭ ވިދާޅުވީ އެމްޑީޕީ އަށް ނުވަތަ މި ސަރުކާރަށް ފާޑު ކިޔާތީ އެއްވެސް ވަރަކަށް ކަންބޮޑުނުވާ ކަމަށާއި ފާޑު ކިޔައި ޝަކުވާ ކުރަނީވެސް އެބޭފުޅުންނަކީ ނަތީޖާއެއް ނެރުމުގެ ނިޔަތުގައި އުޅޭ ބަޔަކަށް ވާތީ ކަމަށެވެ.
ނަރުދަމާ ނާޅައިގެންނާއި މަސްވެރިންނަށް ހަމަ އަގު ނުލިބިގެންނާއި ރިސޯޓު މުވައްޒަފުންގެ ހައްޤު ނުލިބިގެންނާއި އަންހެނުންގެ ހައްޤުތައް ނުލިބިގެންވެސް އެމްޑީޕީން ވެރިކަމުގައި ހުންނައިރު ޝަކުވާ ކުރާނެ ކަމަށެވެ. ޝަކުވާ ކުރަނީ ޝަކުވާ ކުރުމުގެ ފުރުޞަތުވެސް މިއަދު އޮތީމަައި ކަމަށާއި ރައްޔިތުންނަށް އުއްމީދެއްވެސް އޮތީމައި ކަމަށް ފިއްޓޭ ވިދާޅުވިއެވެ.
"އަޅުގަނޑުމެން ވެރިކަމަށް އައީ 5 އަހަރުގެ ދަޢުރަކަށް ވަޢުދު ތަކެއް ވެގެން. އެއް އަހަރު ތެރޭ ހުރިހާ ވަޢުދެއް ފުއްދާކަށް ނޫން. ވަޢުދުތައް މިހާރުވެސް ދަނީ ފުދެމުން" ފިއްޓޭ ވިދާޅުވި އެވެ.
މިސަރުކާރާއި ދޭތެރޭ ރައްޔިތުންގެ ޔަޤީންކަމެއް އޮންނާނެ ކަމަށާއި ކަންކަން ނުވީމައި އެޝަކުވާ ކުރަނީ ކޮށްދޭނެކަން ޔަޤީންވާތީ ކަމަށް ފިއްޓޭ ވަނީ ވިދާޅުވެފައެވެ.
