ހިއުމަން ރައިޓްސް ކޮމިޝަން އޮފް ދަ މޯލްޑިވްސްގެ މެންބަރުކަމުގެ މަޤާމު ހުސްވެފައިވާތީ، އެ ކޮމިޝަނަށް މެންބަރުން ޢައްޔަނުކުރެއްވުމަށްޓަކައި މެންބަރުކަމުގެ މަގާމަށް ކުރިމަތިލުމުގެ ފުރުޞަތު، ރައީސުލްޖުމްހޫރިއްޔާގެ އޮފީހުން މިއަދު ހުޅުވާލައްވައިފިއެވެ.
މެންބަރުކަމުގެ ފޯމު ބަލައިގަތުމަށް ހަމަޖެހިފައިވަނީ، މިމަހުގެ 16 އަދި 17 ވަނަ ދުވަހުގެ އިތުރުން 18 ވަނަ ދުވަހު ހެނދުނު 09:30 އިން މެންދުރުފަހު 12:30 އަށް، ރައީސުލްޖުމްހޫރިއްޔާގެ އޮފީހުންކަމަށް އެ އޮފީހުން ބުނެ އެވެ.
އަދި އެޗްއާރްސީއެމްގެ މެންބަރުކަމަށް ކުރިމަތިލުމަށް އެދޭ ފޯމު ރައީސުލްޖުމްހޫރިއްޔާގެ އޮފީހުގެ ވެބްސައިޓު www.presidencymaldives.gov.mv އިން ޑައުންލޯޑް ކުރެވެން ހުންނާނެ ކަމަށްވެސް އެ އޮފީހުން ބުނެއެވެ.
ކޮމިޝަނުގެ ހަތަރު މެމްބަރެއްގެ ދައުރު ހަމަވާތީ އެ ކޮމިޝަނަށް ކުރިމަތިލުމަށް ހުޅުވާލާފައިވާއިރު، މިދިޔަ މަހުގެ 12 ވަނަ ދުވަހު ވަނީ ކޮމިޝަނުގެ ރައީސް، އައިމިނަތު އީނާސްގެ އިތުރުން މެމްބަރު، އައިޝަތު އަފްރީން މަގާމުން އިސްތިއުފާ ދެއްވާފައެވެ.
