ޓޫރިޒަމް މިނިސްޓަރު ކަމަށް ރައީސުލްޖުމްހޫރިއްޔާ އައްޔަން ކުރެއްވި ޑރ އަބްދުﷲ މައުސޫމަށް ރުހުން ދިނުމުގެ މައްސަލަ ދިރާސާކުރަން ރައްޔިތުންގެ މަޖިލީހުގެ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާއި ކޮމިޓީއަށް ފޮނުވައިފި އެވެ.
އެމަނިކުފާނަށް މަޤާމުގެ ފަތްކޮޅު ދެއްވާފައި ވަނީ މިދިޔަ ބުރާސްފަތި ދުވަހުގައެވެ.
ޑރ. މައުސޫމަށް ރުހުން ހޯދުމަށް ރައީސް ސޯލިހު ރައްޔިތުންގެ މަޖިލީހަށް ފޮނުއްވި މައްސަލަ އާއި ގުޅިގެން މަޖިލީހުގެ ރައީސް މުހައްމަދު ނަޝީދު ވިދާޅުވީ، މައުސޫމަށް ރުހުން ދިނުމުގެ މައްސަލަ މަޖިލީހަށް ލިބިފައިވާ ކަމަށާއި އަދި އެކަން ދިރާސާކުރުމަށް ސަރުކާރުގެ މަސްއޫލިއްޔަތު އަދާކުރާ މިންވަރު ބަލާއި ކޮމިޓީއަށް ފޮނުވާފައިވާ ކަމަށެވެ.
ޑރ. މަޢުސޫމް ޓޫރިޒަމް މިނިސްޓަރުކަމުގެ މަގާމަށް ޢައްޔަންކުރުމުގެ ކުރިން ހުންނެވީ ސިންގަޕޫރަށް ރައްޖެއިން ކަނޑައަޅާފައިވާ ސަފީރުގެ މަޤާމުގައެވެ. އަދި ކޮމަންވެލްތް އޮފް އޮސްޓްރޭލިއާއަށް ދިވެހިރާއްޖެއިން ކަނޑައަޅާ ނޮން-ރެސިޑެންޓް ސަފީރުކަމުގެ މަޤާމާއި، ނިއުޒިލޭންޑަށް ދިވެހިރާއްޖެއިން ކަނޑައަޅާ ނޮން-ރެސިޑެންޓް ސަފީރުގެ މަޤާމު ވެސް ވަނީ ފުރުއްވާފައެވެ. އަދި ކެލާ ދާއިރާގެ ރައްޔިތުންގެ މަޖިލީހުގެ މެންބަރުކަން 2009 ވަނަ އަހަރު ވަނީ ޑރ. މަޢުސޫމް ފުރުއްވާފައެވެ.
ޑރ. މަޢުސޫމް ވަނީ މީގެ ކުރިން މިނިސްޓަރ އޮފް ޓޫރިޒަމް އެންޑް ސިވިލް އޭވިއޭޝަންގެ މަޤާމާއި، ޑެޕިއުޓީ މިނިސްޓަރ އޮފް ޓޫރިޒަމް އެންޑް ސިވިލް އޭވިއޭޝަންގެ މަޤާމާއި، މިނިސްޓަރ އޮފް އެންވަޔަރަންމަންޓް، އެނަރޖީ އެންޑް ވޯޓަރގެ މަޤާމު ފުރުއްވާފައެވެ.
ޓޫރިޒަމް މިނިސްޓަރުގެ މަޤާމަށް ޑރ. އަބްދުﷲ މަޢުޞޫލް އައްޔަން ކުރައްވާފައި މިވަނީ އެ މަޤާމްގައި ކުރިން ހުންނެވި އަލީ ވަހީދު އެމަޤާމުން ދުރު ކުރެއްވުމާއި ގުޅިގެންނެވެ. އެގޮތުން ޢަލީ ވަހީދު ޓޫރިޒަމް މިނިސްޓަރުގެ މަޤާމުން ރައީސުލް ޖުމްހޫރިއްޔާ ދުރު ކުރައްވާފައި ވަނީ އެ ބޭފުޅާއަށް ކުރެވުނު ޖިންސީ ފުރައްސާރައިގެ ބޮޑެތި ތުހުމަތުތަކަކާއި ގުޅިގެން ޖުލައި 9 ވަނަ ދުވަހުއެވެ.
ޢަލީ ވަހީދު އަކީ ޖުމްހޫރީ ޕާޓީގެ ފަރާތުން ޓޫރިޒަމް މިނިސްޓަރު ކަމުގެ މަޤާމަށް އައިސްފައިވާ ބޭފުޅެކެވެ. އެ މަޤާމަށް އަލަށް އައްޔަން ކުރެވުނު ޑރ. ޢަބްދުﷲ މަޢުޞޫމް އަކީވެސް ޖުމްހޫރީ ޕާޓީގެ ސްލޮޓެކެވެ.
