ގައިދުރުކަމަށް އެޅޭ ކޮންމެ ފިޔަވަޅަކުން ކޮވިޑް-19 ފެތުރޭ މިންވަރު ދަށްވުމުގެ ފުރުސަތު ބޮޑު ކަމަށް ޓޫރިޒަމް މިނިސްޓަރު ޑޮކްޓަރ ޢަބްދުﷲ މަޢުޞޫމް ވިދާޅުވެއްޖެ އެވެ.
ޑރ. ޢަބްދުﷲ މަޢުޞޫމް ރޭ ކުރެއްވި ޓްވީޓެއްގައި ވިދާޅުވެފައިވަނީ މީސްތަކުންގެ ގައިގޯޅި ކަމާއި ކޮވިޑް-19 ފެތުރުމާ ގުޅުން ހުރި ކަމަށާއި ގައިދުރުކަމަށް އެޅޭ ކޮންމެ ފިޔަވަޅަކުން ކޮވިޑް-19 ފެތުރޭ މިންވަރު ދަށްވުމުގެ ފުރުސަތު ބޮޑު ކަމަށެ.
ރާއްޖެ އަށް އަންނަ ގެސްޓުންގެ އަދަދު މަތިކުރުމަށާއި ކޮވިޑް-19 އަށް ފައްސި ވާ މީހުންގެ އަދަދު ދަށްކުރުމަށް އަދި ގެސްޓް ހައެސްތައް ހުޅުވުމުގެ ފުރުސަތު ތަނަވަސް ކުރުމަށް އުޅެެން ޖެހޭ ކަމަށް މަޢުޞޫމް ވިދާޅުވިއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ކަނޑއަޅާފައިވާ ގައިޑް ލައިނާ އެއްގޮތަށް އާންމު ހިދުމަތް ދޭ ތަންތަނުން އަމަލު ކުރޭތޯ ބެލުމަށް މިމަހުގެ 25 ވަނަ ދުވަހުން ފެށިގެން ޚާއްސަ އިންސްޕެކްޝަނެއް ފަށާނެ ކަމަށް ނޭޝަނަލް ހެލްތު އިމަޖެންސީ އޮޕަރޭޝަން ސެންޓަރުން ވަނީ ވިދާޅުވެފައެވެ.
އަދި ކޮވިޑް-19 ގެ ބިރުވެރިކަން އިތުރަށް ބޮޑުވެ މާލޭގައި ކޮވިޑް-19 އަށް ފައްސި ވާ މީހުންގެ އަދަދު އިތުރުވަމުން ދިތުމާއި ގުޅިގެން މިރެއިން ފެށިގެން 20:00 އިން ފެށިގެން ފަތިހު 05:00 އާއި ދެމެދު މާލެ އާއި ހުޅުމާލެ އަދި ވިލިމާލެގައި އެއްގަމު އުޅަނދު ދުއްވުން ވަނީ މަނާކޮށްފައެވެ.
މިހާތަނަށް މުޅި ޖުމްލަ 102،682 ސާމްޕަލް ނަގައިފައިވާއިރު ރާއްޖެ އިން ކޮވިޑް-19 އަށް ޕޮޒިޓިވުވެފައިވަނީ، 6،660 މީހުންނެވެ. އަދި މީގެތެރެއިން އެކްޓިވް ކޭސަސްގެ ގޮތުގައި މިވަގުތު ފަރުވާދެމުންދަނީ 2،521 މީހުންނަށެވެ. ކޮވިޑް-19 އިން ރަނގަޅުވި މީހުންގެ އަދަދަކީ 4،012 އެވެ.
ކޮވިޑް-19 އަށް ރާއްޖެއިން ކޮންމެ ދުވަހަކު އެވްރެޖް ގޮތެއްގައި 100 އަށްވުރެ ގިނަ މީހުން ޕޮޒިޓިވުވަމުން އަންނައިރު މިބައްޔަށް މިވަގުތު 169 މީހުންނަށް ފަރުވާދެމުންދަނީ ހޮސްޕިޓަލުގައި އެޑްމިޓް ކޮށްގެންނެވެ.
