ރައްޔިތުންގެ މަޖިލީހުގެ މިދައުރުގެ ފަހު ޖަލްސާ މި އޮގަސްޓު މަހުގެ 31 ވާ ހޯމަ ދުވަހު ބޭއްވުމަށް މަޖިލީހުން ނިންމައިފި އެވެ.
މަޖިލީހުގެ މިއަދުގެ ޖަލްސާ ނިންމަވާ ލައްވަމުން މަޖިލީހުގެ ރިޔާސަތުގައި އިންނެވި މަޖިލީހުގެ ނައިބު ރައީސް އީވާ އަބްދުﷲ ވިދާޅުވީ ރައްޔިތުންގެ މަޖިލީހުގެ މިދައުރު ނިންމާ ޗުއްޓީއަށް ދާނީ މާދަމާ ކަމަށް ކުރިން މަޖިލީހުގެ ރިޔާސަތުން އިޢުލާން ކޮށްފައިވާ ކަމަށެވެ.
ނަމަވެސް ރެސެސްގެ އެންމެ ފަހު މަހުގެ، އެންމެ ފަހު ހޯމަ ދުވަހު ރިސެސްއަށް ދިއުމަށް، މަޖިލީހުގެ ޤަވާއިދު ތަންދޭކަމަށް އީވާ ވިދާޅުވިއެވެ. އެއީ މި އޮގަސްޓު މަހުގެ 31 ވަނަ ދުވަހެވެ.
"އޮގަސްޓު 31 އާއި ހަމަޔަށް އަޅުގަނޑުމެން ރިސެސްއަށް ނުގޮސް މަޑުކޮށްލައިފިއްޔާ، އަޅުގަނޑުމެންނަށް ގާތްގަނޑަކަށް އިތުރު 8 ބިލުގެ މަސައްކަތް އެބަ ނިންމާލެވޭ އަޅުގަނޑުމެން ރިސެސްއަށް ދިއުމުގެ ކުރިން. އެހެންވީމާ އަޅުގަނޑުމެން މިހާރު މި ގަސްތުކުރަނީ، މި ދައުރު ނިންމާނީ އިރާދަކުރެއްވިއްޔާ އޮގަސްޓު 31 ގައި ކަމަށް" މިއަދުގެ މަޖިލިސް ޖަލްސާ ނިންމާލައްވަމުން އީވާ ވިދާޅުވިއެވެ.
ދެން މަޖިލީހުގެ ޖަލްސާއެއް އޮންނާނީވެސް 31 އޮގަސްޓު ވާ ހޯމަ ދުވަހުގެ 09:00 ޖަހާއިރު ކަމަށް އީވާ ވަނީ އިޢުލާން ކުރައްވާފައެވެ.
