އަންހެނުން ހައިޟުވުމާއި ގުޅިގެން ޚާއްސަ ޗުއްޓީއެއް ދިނުމަށް ފޮނަދޫ ދާއިރާގެ މެންބަރު މޫސާ ސިރާޖު ވަޒީފާއާއި ބެހޭ ޤާނޫނަށް އިސްލާހު ހުށައަޅައިފިއެވެ.
އެގޮތުން މެންބަރު މޫސާ ސިރާޖު ހުށައެޅުއްވި އިސްލާހުގައި ވަނީ ސަމާލުގެ ޗުއްޓީގެ އިތުރުން ކޮންމެ އަންހެން މުވައްޒަފަކަށް ހައިޟުވުމާއި ގުޅިގެން ދެވޭ ޗުއްޓީގެ ގޮތުގައި ކޮންމެ މަހަކު މުސާރަ ލިބޭ ގޮތަށް، ވަޒީފާއާއި ބެހޭ ޤާނޫނުގެ ދަށުން ލިބޭ ސަލާމުގެ ޗުއްޓީގެ އިތުރުން 1 ދުވަހުގެ ޗުއްޓީއެއް ދޭންވާނެކަމަށެވެ.
އެގޮތުން މި ޗުއްޓީއަށް އެދޭ މުވައްޒަފު އެ ޗުއްޓީ ޙައްޤުކަން ސާބިތުކޮށްދިނުމަށް އެއްވެސް ލިޔުމެއް ހުށައަޅަން ނުޖެހޭނެކަމަށްވެސް ވަނީ މި އިސްލާހުގައި ހިމަނާފައެވެ.
މީގެ އިތުރުން މި ޗުއްޓީގެ ބޭނުން ނުކޮށް ވަޒީފާއަށް ނިކުންނަނަމަ ކޮންމެ މަހަކަށް ދެވޭ މުސާރައިގެ އިތުރުން އެ މުވައްޒަފެއްގެ އަސާސީ މުސާރައިން 1 ދުވަހަށް ޖެހޭ މިންވަރު އެ މުވައްޒަފަކަށް ދޭންވެސް އިސްލާހުގައި ބުނެފައިވެއެވެ.
މެންބަރު މޫސާ ސިރާޖު ވިދާޅުވެފައިވަނީ އުންމީދު ކުރަނީ މި އިސްލާހު ފާސްވެގެން ދާނެކަމަށެވެ.
ސަރުކާރުން ވަނީ ވަޒީފާއާއި ބެހޭ ޤާނޫނަށް ގިނަ އިސްލާހުތަކެއް ހުށައަޅާފައެވެ.
